گوجرانوالہ ماس ٹرانزٹ سسٹم کی منظوری، وزیراعلیٰ پنجاب نے 31.5 کلومیٹر منصوبے کی منظوری دے دی

(لاہور) مریم نواز کی زیر صدارت اجلاس میں گوجرانوالہ ماس ٹرانزٹ سسٹم کے ڈیزائن کی منظوری دے دی گئی، جس سے شہر میں جدید ٹرانسپورٹ نظام متعارف کرانے کی راہ ہموار ہو گئی ہے۔

اجلاس میں منصوبے کے مختلف پہلوؤں پر تفصیلی بریفنگ دی گئی۔ وزیراعلیٰ پنجاب نے ہدایت کی کہ گوجرانوالہ کے ہر علاقے کو فیڈر بسوں کے ذریعے میٹرو ٹرین سے منسلک کیا جائے تاکہ شہریوں کو بہتر اور آسان سفری سہولیات فراہم کی جا سکیں۔

ٹریفک کی روانی بہتر بنانے کیلئے منصوبے میں دو ٹنل سیکشن شامل کرنے اور 17 سے 19 کلومیٹر ٹریک کو انڈرگراؤنڈ گزارنے کی بھی منظوری دی گئی۔

بریفنگ کے مطابق 31.5 کلومیٹر طویل یہ منصوبہ گکھڑ سے ایمن آباد تک پھیلا ہوگا اور اس کی تکمیل کیلئے 12 ماہ کی مدت مقرر کی گئی ہے۔ منصوبے میں مجموعی طور پر 24 اسٹیشنز بنائے جائیں گے جن میں سے 2 انڈرگراؤنڈ ہوں گے۔

ہر اسٹیشن اور ڈپو پر سولر سسٹم نصب کیا جائے گا جبکہ گرجاکھ، چن دا قلعہ اور گوندلا والا میں ڈپو قائم کیے جائیں گے۔

منصوبے کے دونوں اطراف 62 کلومیٹر طویل ڈرین بھی تعمیر کی جائے گی جبکہ ایک جدید کمانڈ اینڈ کنٹرول سینٹر بھی قائم کیا جائے گا تاکہ ٹرانسپورٹ آپریشن کو مؤثر انداز میں مانیٹر کیا جا سکے۔

وزیراعلیٰ پنجاب کا کہنا تھا کہ اس منصوبے سے گوجرانوالہ میں ٹرانسپورٹ کلچر تبدیل ہو جائے گا اور شہریوں کو جدید، محفوظ اور معیاری سفری سہولت میسر آئے گی۔