مصباح ارشد مس یونیورس پاکستان منتخب، عالمی مقابلے میں ملک کی نمائندگی کریں گی

لاہور: مصباح ارشد کو ملک کی چوتھی مس یونیورس پاکستان منتخب کرلیا گیا ہے۔ وہ آئندہ مس یونیورس کے عالمی مقابلے میں پاکستان کی نمائندگی کرنے والی چوتھی پاکستانی بن جائیں گی۔

مصباح ارشد کی کامیابی کا اعلان فلپائن میں منعقدہ ایک تقریب کے دوران کیا گیا، جہاں مس یونیورس پاکستان کے فرنچائز مالک جوش یوگن نے انہیں اعزازی پٹی پہنائی جبکہ سابق مس یونیورس پاکستان روما ریاض نے انہیں تاج پہنایا۔

مصباح ارشد کا انتخاب آخری سوال کے بعد کیا گیا۔ فلپائن کے موسیقار اور اداکار بیلی مے نے ان سے پوچھا کہ اگر انہیں اپنی 10 سالہ اور 80 سالہ شخصیت کے ساتھ ایک کمرے میں بٹھایا جائے تو ان دونوں میں سے کون ان سے زیادہ مشکل سوال کرے گی؟

مصباح ارشد نے جواب دیا کہ ان کی 10 سالہ شخصیت زیادہ مشکل سوال کرے گی، کیونکہ وہ ان سے پوچھے گی کہ زندگی آخر کیسی گزری۔ انہوں نے کہا کہ وہ اپنی کم عمر شخصیت کو بتائیں گی کہ زندگی میں کئی مواقع پر ناکامی کا سامنا کرنا پڑا، تاہم اصل مقصد ہر بار دوبارہ اٹھ کھڑے ہونا ہے۔

انہوں نے زندگی کو ایک خوبصورت چکر قرار دیتے ہوئے کہا کہ انسان کو زندگی کو صرف قبول نہیں کرنا چاہیے بلکہ اسے بھرپور انداز میں جینا چاہیے۔ ان کے مطابق آگ جتنی تیز ہوتی ہے، سونا اتنا ہی خالص ہوتا ہے۔

مصباح ارشد نفسیات کی طالبہ ہیں اور انہیں عالمی حسن کے مقابلوں میں شرکت کا تجربہ بھی حاصل ہے۔ وہ 2023 میں جاپان میں منعقد ہونے والے مس انٹرنیشنل مقابلے میں پاکستان کی نمائندگی کرچکی ہیں، جبکہ 2024 میں پولینڈ میں ہونے والے مس سپرا نیشنل مقابلے میں بھی شریک ہوئی تھیں۔

اب مصباح ارشد پورٹو ریکو روانہ ہوں گی، جہاں وہ مس یونیورس کے 75ویں عالمی مقابلے میں پاکستان کی نمائندگی کریں گی۔

اپنی کامیابی پر جاری کیے گئے پیغام میں مصباح ارشد نے کہا کہ ناکامی اس بات کا تعین نہیں کرتی کہ انسان فاتح ہے یا نہیں، بلکہ اصل کامیابی امید کو زندہ رکھنے، مسلسل کوشش کرنے اور ہر قدم کے ساتھ خود کو بہتر بنانے میں ہے۔

انہوں نے کہا کہ اگرچہ انہیں تاج مل گیا ہے، تاہم ان کے لیے اصل انعام اس سفر کے تجربات، سیکھے گئے اسباق اور اس دوران ملنے والے لوگ ہیں۔