وفاقی آئینی عدالت کا بڑا فیصلہ، مونال ریسٹورنٹ گرانے کا حکم کالعدم قرار

(اسلام آباد)وفاقی آئینی عدالت نے اسلام آباد کے معروف مونال ریسٹورنٹ سے متعلق اہم فیصلہ سناتے ہوئے اسے گرانے کے سابقہ حکم کو کالعدم قرار دے دیا ہے۔ عدالت نے کیپیٹل ڈیولپمنٹ اتھارٹی (سی ڈی اے) اور میٹروپولیٹن کارپوریشن اسلام آباد کی اپیلیں منظور کرتے ہوئے پہلے سے جاری حکمِ امتناعی بھی ختم کر دیا۔

عدالت نے اپنے فیصلے میں قرار دیا کہ ملکیت اور دیگر متنازع امور کا حتمی فیصلہ متعلقہ ٹرائل کورٹس کریں گی اور وہ اس ضمن میں کسی عدالتی ریمارکس سے متاثر ہوئے بغیر آزادانہ طور پر فیصلہ کرنے کی مجاز ہوں گی۔ آئینی عدالت نے ٹرائل کورٹس کو مقدمات کے جلد از جلد فیصلے کی بھی ہدایت جاری کی۔

سماعت کے دوران جسٹس حسن اظہر رضوی نے ریمارکس دیے کہ سپریم کورٹ کے سابقہ فیصلے میں بعض اہم نکات کو مدنظر نہیں رکھا گیا تھا، جبکہ کچھ ایسی باتیں بھی شامل کر دی گئی تھیں جن کا مقدمے کے ریکارڈ سے تعلق نہیں تھا۔ انہوں نے کہا کہ عدالت جذبات کی بنیاد پر نہیں بلکہ قانون اور آئین کے مطابق فیصلے کرے گی اور غیر ضروری مشاہدات سے گریز کیا جائے گا۔

یاد رہے کہ سپریم کورٹ نے 21 اگست 2024 کو مارگلہ ہلز نیشنل پارک کے علاقے میں قائم مونال ریسٹورنٹ کو گرانے کا حکم دیا تھا۔ یہ فیصلہ اُس وقت کے چیف جسٹس قاضی فائز عیسیٰ کی سربراہی میں سنایا گیا تھا۔

سپریم کورٹ کے فیصلے کے بعد مونال انتظامیہ نے 9 ستمبر 2024 کو ریسٹورنٹ کی مکمل بندش کا اعلان کیا تھا۔ انتظامیہ نے سوشل میڈیا پر جاری اپنے پیغام میں صارفین کا شکریہ ادا کرتے ہوئے کہا تھا کہ 2006 سے شروع ہونے والا یہ سفر یادگار رہا اور پاکستان کی خوبصورتی کو دنیا کے سامنے پیش کرنا ان کے لیے باعثِ فخر تھا۔

مونال انتظامیہ نے اپنے الوداعی پیغام میں لکھا تھا کہ صارفین کے اعتماد، محبت اور تعاون نے اس ادارے کو ایک منفرد شناخت دی، جبکہ اس سفر کے دوران حاصل ہونے والی کامیابیاں اور یادیں ہمیشہ ان کے ساتھ رہیں گی۔

آئینی عدالت کے حالیہ فیصلے کو قانونی حلقوں میں ایک اہم پیش رفت قرار دیا جا رہا ہے، جس کے بعد مونال ریسٹورنٹ سے متعلق قانونی اور انتظامی معاملات کے مستقبل پر نئی بحث شروع ہو گئی ہے۔