نواز شریف کو گلگت بلتستان دورے کی اجازت، الیکشن کمیشن نے این او سی جاری کر دیا

مسلم لیگ (ن) کے صدر اور سابق وزیراعظم نواز شریف کو گلگت بلتستان کے انتخابی دورے کی باضابطہ اجازت مل گئی ہے۔ چیف الیکشن کمشنر گلگت بلتستان نے ان کے دورے کے لیے عدم اعتراض سرٹیفکیٹ (این او سی) جاری کر دیا ہے۔

الیکشن کمیشن کے مطابق نواز شریف 2 جون کو انتخابی سرگرمیوں کے سلسلے میں گلگت بلتستان پہنچیں گے اور مختلف علاقوں میں پارٹی امیدواروں کی انتخابی مہم میں حصہ لیں گے۔

جاری کردہ این او سی میں واضح کیا گیا ہے کہ نواز شریف کا دورہ انتخابی ضابطۂ اخلاق کی مکمل پابندی سے مشروط ہوگا۔ الیکشن کمیشن نے خبردار کیا ہے کہ انتخابی قوانین یا ضابطہ اخلاق کی کسی بھی خلاف ورزی کی صورت میں قانونی کارروائی عمل میں لائی جا سکتی ہے۔

ذرائع کے مطابق مسلم لیگ (ن) کی جانب سے دی گئی درخواست پر الیکشن کمیشن نے تمام قانونی تقاضے پورے ہونے کے بعد دورے کی منظوری دی۔ اس سلسلے میں باقاعدہ اجازت نامہ بھی جاری کر دیا گیا ہے۔

نواز شریف کا یہ دورہ گلگت بلتستان انتخابات کے تناظر میں اہم قرار دیا جا رہا ہے، جہاں مختلف سیاسی جماعتیں انتخابی مہم تیز کر رہی ہیں۔ مسلم لیگ (ن) کی قیادت کو امید ہے کہ نواز شریف کی انتخابی سرگرمیوں سے پارٹی امیدواروں کو فائدہ پہنچے گا اور ووٹرز کی حمایت میں اضافہ ہوگا۔