این سی سی آئی اے انکوائری، محمد رضوان نے سوال نامے کا جواب جمع کرا دیا

لاہور: قومی کرکٹر محمد رضوان نے نیشنل سائبر کرائم انویسٹی گیشن ایجنسی (NCCIA) کے سوال نامے کا جواب جمع کرا دیا، جس میں انہوں نے کہا ہے کہ آج تک انہیں یہ نہیں بتایا گیا کہ کس آن لائن جوئے سے منسلک کیا جا رہا ہے۔

محمد رضوان نے اپنے جواب میں مؤقف اختیار کیا کہ بطور کرکٹر انہوں نے اپنی اہلیت کے مطابق پاکستانی ٹیم کی خدمت کی، تاہم آج تک انہیں نہ متعلقہ آن لائن جوئے کے بارے میں بتایا گیا اور نہ ہی کسی وقوعے اور اس میں اپنے مبینہ کردار سے آگاہ کیا گیا۔

قومی کرکٹر کے مطابق پیشی کے دوران انہوں نے متعدد مرتبہ اپنے خلاف لگائے گئے الزامات کی تفصیلات طلب کیں، لیکن پوچھنے کے باوجود انہیں الزامات سے متعلق مکمل معلومات فراہم نہیں کی گئیں۔

محمد رضوان نے کہا کہ کرکٹرز سے متعلق کرپشن کے معاملات کے لیے انٹرنیشنل کرکٹ کونسل (ICC) کا اینٹی کرپشن یونٹ متعلقہ فورم ہے۔ ان کا کہنا تھا کہ موجودہ کرکٹر ہونے کے باوجود ان کے خلاف عائد الزامات آئی سی سی کے اینٹی کرپشن یونٹ کو رپورٹ نہیں کیے گئے۔

انہوں نے سوال اٹھایا کہ ایسے معاملے کی این سی سی آئی اے کی جانب سے انکوائری سمجھ سے بالاتر ہے۔ محمد رضوان نے کہا کہ اگر کسی کرکٹر کے خلاف ایسی شکایت یا الزام ہو تو اس کی تحقیقات آئی سی سی کے اینٹی کرپشن یونٹ کے دائرہ اختیار میں آتی ہیں۔

قومی کرکٹر نے مطالبہ کیا کہ انہیں اپنے خلاف لگائے گئے الزامات کی مکمل تفصیلات فراہم کی جائیں تاکہ وہ انکوائری میں مؤثر طور پر اپنا مؤقف پیش کر سکیں۔ انہوں نے کہا کہ اگر ان پر کوئی ایسا الزام ہے تو معاملہ فوری طور پر آئی سی سی کے اینٹی کرپشن یونٹ کو بھجوایا جائے۔