ایران سے مذاکرات آج دوپہر سے شروع ہوں گے، امریکی صدر ڈونلڈ ٹرمپ

واشنگٹن: امریکی صدر ڈونلڈ ٹرمپ نے اعلان کیا ہے کہ ایران کے ساتھ مذاکرات آج دوپہر سے شروع ہوں گے۔ ان کے مطابق تہران کے ساتھ رابطے ایک طے شدہ مذاکراتی فریم ورک کے تحت جاری ہیں۔

اپنے بیان میں صدر ٹرمپ نے کہا کہ آبنائے ہرمز سے متعلق معاہدہ موجود ہے اور انہیں امید ہے کہ ایران کے ایٹمی ہتھیاروں کے خاتمے کے حوالے سے بھی معاہدہ طے پا جائے گا۔

انہوں نے دعویٰ کیا کہ ایران پر بڑے فوجی حملے کا منصوبہ سعودی عرب، متحدہ عرب امارات، قطر اور خود ایران کی درخواست پر منسوخ کیا گیا۔

صدر ٹرمپ کے مطابق خطے کے اہم ممالک کی اپیل پر حملہ روکنے کا فیصلہ کیا گیا۔ ان کا کہنا تھا کہ اگر یہ حملہ کیا جاتا تو دوسری جنگ عظیم کے بعد یہ سب سے بڑا فوجی حملہ ہوتا۔

صدر ٹرمپ نے مذاکرات کی کامیابی کے حوالے سے امید کا اظہار کرتے ہوئے کہا کہ سفارتی ذرائع سے مسائل کے حل کے لیے کوششیں جاری رہیں گی، جبکہ ایران کے جوہری پروگرام سمیت دیگر اہم امور پر بات چیت مذاکرات کا حصہ ہوں گے۔