نیتن یاہو اچانک ابوظہبی پہنچ گئے، اماراتی صدر سے ملاقات

(ابوظہبی-رائٹرز )اسرائیلی وزیراعظم بنیامین نیتن یاہو نے اتوار کو اچانک متحدہ عرب امارات کا دورہ کیا، جہاں ایک سینئر اسرائیلی عہدیدار کے مطابق انہوں نے ابوظہبی میں اماراتی صدر شیخ محمد بن زاید آل نہیان سے ملاقات کی۔

برطانوی خبر رساں ادارے رائٹرز کے مطابق اسرائیلی عہدیدار نے ملاقات کی تصدیق کی ہے، تاہم نیتن یاہو کے دفتر اور متحدہ عرب امارات کی وزارت خارجہ کی جانب سے فوری طور پر اس حوالے سے کوئی باضابطہ بیان جاری نہیں کیا گیا۔

نجی طیارے پر ابوظہبی کا سفر

اسرائیلی میڈیا کے مطابق نیتن یاہو نے نجی طیارے کے ذریعے ابوظہبی کا سفر کیا اور ایک روزہ دورے کے بعد واپس اسرائیل روانہ ہوگئے۔ تاہم دونوں رہنماؤں کے درمیان ہونے والی ملاقات کے ایجنڈے یا زیرِ بحث آنے والے معاملات کی تفصیلات فوری طور پر سامنے نہیں آسکیں۔

رواں سال مئی میں بھی دورے کا دعویٰ

یہ پہلا موقع نہیں کہ نیتن یاہو کے خفیہ دورۂ متحدہ عرب امارات کی اطلاعات سامنے آئی ہوں۔ رواں سال مئی میں بھی اسرائیلی وزیراعظم کے دفتر نے ان کے یو اے ای کے دورے اور اماراتی صدر سے ملاقات کا اعلان کیا تھا، تاہم امارات نے اس ملاقات کی تردید کی تھی۔

رائٹرز کے مطابق بعد میں ایک ذریعے نے بتایا تھا کہ نیتن یاہو اور شیخ محمد بن زاید نے 26 مارچ کو ابوظہبی کے علاقے العین میں ملاقات کی تھی۔

ملاقات ایسے وقت میں ہوئی جب خطے کی صورتحال حساس ہے

نیتن یاہو اور شیخ محمد بن زاید کے درمیان حالیہ ملاقات ایک ایسے وقت میں ہوئی ہے جب مشرق وسطیٰ کی سیکیورٹی صورتحال اور اسرائیل، ایران اور دیگر علاقائی فریقوں کے درمیان کشیدگی عالمی توجہ کا مرکز ہے۔

اسرائیل اور متحدہ عرب امارات نے 2020 میں ابراہم معاہدوں کے تحت سفارتی تعلقات قائم کیے تھے، جس کے بعد دونوں ممالک کے درمیان مختلف شعبوں میں روابط برقرار رہے ہیں۔

7 اکتوبر سے قبل مبینہ انتباہ کا معاملہ بھی زیرِ بحث

نیتن یاہو کا حالیہ دورہ ایک ایسے وقت میں سامنے آیا ہے جب اسرائیلی اخبار ’ہارٹز‘ کی ایک رپورٹ کے بعد یہ دعویٰ بھی زیرِ بحث ہے کہ شیخ محمد بن زاید نے 7 اکتوبر 2023 کے حماس حملے سے تقریباً ڈیڑھ ہفتہ قبل نیتن یاہو کو حماس کی جانب سے بڑے آپریشن کی مبینہ تیاری سے آگاہ کیا تھا۔

نیتن یاہو نے اس رپورٹ کی تردید کی ہے اور امارات نے اس معاملے پر براہِ راست تبصرہ نہیں کیا۔ اماراتی حکام نے ماضی میں تاہم کہا ہے کہ دونوں ممالک کے درمیان رابطے برقرار ہیں۔