نمرہ خان نے شوہر کی جھلک دکھا دی، دوسری شادی کی تصاویر وائرل

پاکستانی اداکارہ نمرہ خان ایک بار پھر رشتۂ ازدواج میں منسلک ہو گئی ہیں اور انہوں نے اپنی شادی کی خوشی مداحوں کے ساتھ سوشل میڈیا پر شیئر کر دی ہے۔

اداکارہ نے فوٹو اینڈ ویڈیو شیئرنگ پلیٹ فارم انسٹاگرام پر پیرس میں ہونے والے اپنے خصوصی فوٹو شوٹ کی تصاویر شیئر کیں، جن میں وہ گلابی رنگ کے مغربی طرز کے خوبصورت گاؤن میں دکھائی دیں۔ ابتدائی تصاویر میں انہوں نے اپنے شوہر کا چہرہ ظاہر نہیں کیا تھا، جس کے باعث مداحوں میں تجسس پایا جا رہا تھا۔

بعد ازاں نمرہ خان نے اپنے نکاح کی تصاویر بھی شیئر کر دیں، جن میں ان کے شوہر پہلی بار واضح طور پر نظر آئے۔ نکاح کی تقریب میں اداکارہ نے سنہرے رنگ کی کڑھائی سے مزین سفید روایتی لباس زیب تن کیا، جبکہ ان کے شوہر سفید شلوار قمیض اور سنہری کڑھائی والے کوٹ میں ملبوس دکھائی دیے۔

اداکارہ نے انسٹا اسٹوریز میں ایک خصوصی کیک کی تصویر بھی شیئر کی، جس پر جہاز اور پائلٹ کو دلہن کے ساتھ دکھایا گیا تھا۔

نمرہ خان نے انکشاف کیا کہ ان کے شوہر پیشے کے لحاظ سے کیپٹن اور پائلٹ ہیں۔ تاہم انہوں نے تاحال اپنے شوہر کا نام ظاہر نہیں کیا۔

واضح رہے کہ یہ نمرہ خان کی دوسری شادی ہے۔ اس سے قبل انہوں نے 2020 میں راجہ افتخار سے شادی کی تھی، جو بعد میں علیحدگی پر ختم ہو گئی تھی۔