مریکا ایران ممکنہ معاہدہ: عالمی مارکیٹ میں خام تیل کی قیمتوں میں مزید 3 فیصد کمی

امریکا اور ایران کے درمیان ممکنہ معاہدے کی توقعات کے باعث عالمی منڈی میں خام تیل کی قیمتوں میں کمی کا رجحان برقرار ہے، جہاں تیل کی قیمتوں میں مزید 3 فیصد کمی ریکارڈ کی گئی ہے۔

مارکیٹ ذرائع کے مطابق ڈبلیو ٹی آئی خام تیل کی قیمت کم ہو کر 85 ڈالر فی بیرل تک آ گئی ہے، جبکہ برینٹ خام تیل بھی گراوٹ کے بعد 83 ڈالر فی بیرل پر ٹریڈ کر رہا ہے۔

ماہرین کا کہنا ہے کہ سرمایہ کار امریکا اور ایران کے درمیان ممکنہ معاہدے سے متعلق پیش رفت پر گہری نظر رکھے ہوئے ہیں۔ اگر معاہدہ طے پا جاتا ہے تو عالمی منڈی میں ایرانی تیل کی فراہمی میں اضافے کا امکان پیدا ہو سکتا ہے، جس کے باعث سپلائی بڑھنے اور قیمتوں پر مزید دباؤ آنے کی توقع کی جا رہی ہے۔

حالیہ دنوں میں امریکی اور ایرانی حکام کی جانب سے معاہدے کے حوالے سے مختلف بیانات سامنے آئے ہیں، جس کے باعث توانائی کی عالمی منڈی میں غیر یقینی صورتحال پیدا ہوئی ہے۔ تاہم ممکنہ ڈیل کی خبروں نے تیل کی قیمتوں کو نیچے لانے میں اہم کردار ادا کیا ہے۔