بلوچستان میں سکیورٹی فورسز کا بڑا آپریشن، 7 دہشتگرد ہلاک، میجر سمیت 5 جوان شہید

(راولپنڈی )پاک فوج کے شعبہ تعلقات عامہ کے مطابق سکیورٹی فورسز نے خفیہ اطلاع پر بارکھان میں کارروائی کی جہاں دہشت گردوں کے ایک گروہ کا سراغ لگا کر انہیں نشانہ بنایا گیا۔

آئی ایس پی آر کے مطابق آپریشن کے دوران دہشت گردوں اور سکیورٹی فورسز کے درمیان شدید فائرنگ کا تبادلہ ہوا جس میں فتنہ الہندوستان کے 7 دہشت گرد جہنم واصل ہوگئے۔

ترجمان پاک فوج نے بتایا کہ کارروائی کے دوران میجر توصیف احمد بھٹی سمیت 5 جوانوں نے بہادری سے لڑتے ہوئے جام شہادت نوش کیا۔ شہداء میں نائیک فدا حسین، سپاہی سہیل احمد، سپاہی ذاکر حسین اور سپاہی محمد ایاز شامل ہیں۔

آئی ایس پی آر کے مطابق مارے گئے دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد کیا گیا ہے۔

ترجمان پاک فوج کا کہنا تھا کہ وژن “عزمِ استحکام” کے تحت پاکستان کی سکیورٹی فورسز ملکی سلامتی اور سرحدوں کے دفاع کیلئے پرعزم ہیں۔ انہوں نے کہا کہ علاقے میں بھارتی حمایت یافتہ دہشت گرد عناصر کے خاتمے کیلئے کلیئرنس آپریشنز جاری رہیں گے تاکہ بیرونی سرپرستی میں ہونے والی دہشت گردی کا مکمل سدباب کیا جا سکے۔