کویت نے پاکستان کے ساتھ دفاعی تعاون معاہدے کی منظوری دے دی، مشترکہ کمیٹی قائم کرنے کا فیصلہ

کویت سٹی: کویت نے پاکستان کے ساتھ دفاعی تعاون کے ایک اہم معاہدے کی منظوری دے دی ہے، جس کے بعد دونوں برادر ممالک کے درمیان دفاعی، عسکری تربیت اور سیکیورٹی تعاون کو مزید وسعت ملنے کی توقع ظاہر کی جا رہی ہے۔

عرب میڈیا رپورٹس کے مطابق معاہدے کے تحت پاکستان اور کویت عسکری تربیت، دفاعی مہارت، تجربات کے تبادلے اور مشترکہ دفاعی حکمت عملی سمیت مختلف شعبوں میں باہمی تعاون کو فروغ دیں گے۔

رپورٹس میں بتایا گیا ہے کہ معاہدے پر مؤثر عمل درآمد یقینی بنانے کے لیے پاک۔کویت مشترکہ دفاعی کمیٹی قائم کی جائے گی، جس میں دونوں ممالک کے نامزد نمائندے شامل ہوں گے۔ یہ کمیٹی سالانہ اجلاس منعقد کرے گی، جس میں دفاعی تعاون کی پیش رفت کا جائزہ لیا جائے گا اور آئندہ کے لائحہ عمل پر غور کیا جائے گا۔

دفاعی ماہرین کے مطابق یہ معاہدہ پاکستان اور خلیجی ممالک کے درمیان مضبوط ہوتے ہوئے دفاعی تعلقات کی ایک اہم کڑی ہے۔ ان کا کہنا ہے کہ اس سے نہ صرف عسکری تربیت اور پیشہ ورانہ مہارت میں اضافہ ہوگا بلکہ دفاعی اداروں کے درمیان تجربات کے تبادلے اور علاقائی سیکیورٹی تعاون کو بھی مزید تقویت ملے گی۔

ماہرین کا کہنا ہے کہ پاکستان اور خلیجی ممالک کے درمیان کئی دہائیوں پر محیط دفاعی روابط موجود ہیں، اور اس نئے معاہدے سے ان تعلقات کو مزید استحکام حاصل ہوگا۔ اس سے قبل سعودی عرب بھی پاکستان کے ساتھ دفاعی اور سیکیورٹی تعاون بڑھانے کے لیے مختلف مشترکہ اقدامات کر چکا ہے۔