ایشین کرکٹ کونسل کے انتخابات میں پاکستان کی تاریخی کامیابی

ایشین کرکٹ کونسل (اے سی سی) کے انتخابات میں پاکستان نے تاریخی کامیابی حاصل کرتے ہوئے ڈائریکٹرز کی تینوں نشستیں جیت لیں۔

ذرائع کے مطابق بینکاک میں ہونے والے اے سی سی کے سالانہ جنرل اجلاس میں ڈائریکٹرز کے انتخاب کے لیے سخت مقابلہ ہوا، جس میں پاکستان کے حمایت یافتہ پینل نے تینوں نشستوں پر بھارت کے حمایت یافتہ امیدواروں کو شکست دے دی۔

ذرائع کا کہنا ہے کہ اے سی سی کے قیام کے بعد یہ پہلا موقع ہے کہ پاکستان کے حمایت یافتہ پینل نے ڈائریکٹرز کی تینوں نشستوں پر کامیابی حاصل کی ہے، جسے ایشیائی کرکٹ کے انتظامی معاملات میں پاکستان کی اہم پیش رفت قرار دیا جا رہا ہے۔

اے سی سی کے سالانہ جنرل اجلاس کی صدارت چیئرمین محسن نقوی نے کی، جبکہ اجلاس میں بھارت کی نمائندگی راجیو شکلا نے کی۔

ذرائع کے مطابق قطر کرکٹ ایسوسی ایشن کے صدر شیخ عبدالعزیز کو ڈائریکٹر کی نشست کے لیے پاکستان کی حمایت حاصل تھی۔ انتخابی عمل کے دوران مختلف رکن ممالک کے درمیان سخت مقابلہ دیکھنے میں آیا۔

اجلاس میں اے سی سی مینز ایشیا کپ 2027 کے ممکنہ وینیوز پر بھی تبادلہ خیال کیا گیا، جبکہ خطے میں کرکٹ کے فروغ اور کھیل کی ترقی کے لیے مختلف اقدامات بھی زیر غور آئے۔

پاکستان کی حمایت یافتہ پینل کی تینوں نشستوں پر کامیابی کو اے سی سی میں پاکستان کے بڑھتے ہوئے اثر و رسوخ کی علامت قرار دیا جا رہا ہے۔