اسلام آباد میں دوسرے پاکستان ٹورزم، سپورٹس اینڈ فیملی فیسٹیول کا آغاز

اسلام آباد: وفاقی دارالحکومت اسلام آباد میں دوسرے پاکستان ٹورزم، سپورٹس اینڈ فیملی فیسٹیول کا آج سے آغاز ہوگیا ہے، جو 8 نومبر تک پاکستان سپورٹس کمپلیکس میں جاری رہے گا۔ فیسٹیول میں شہریوں اور سیاحوں کے لیے فیملی انٹرٹینمنٹ، کھانے پینے کے اسٹالز اور کھیلوں سمیت متعدد دلچسپ سرگرمیوں کا اہتمام کیا گیا ہے۔

وزیراعظم کے معاون خصوصی برائے سیاحت سردار یاسر الیاس نے کہا ہے کہ فیسٹیول میں ایک لاکھ سے زائد افراد کی آمد متوقع ہے۔ اس ایونٹ کا مقصد دنیا بھر میں پاکستان کا مثبت، پُرامن، مہمان نواز اور محبت کرنے والی قوم کا تشخص اجاگر کرنا ہے۔

انہوں نے کہا کہ پاکستان ایک ایسا ملک ہے جہاں مختلف مذاہب اور ثقافتوں کے لوگ موجود ہیں اور یہاں ہر قسم کی خوشیاں اور تقریبات مل کر منائی جاتی ہیں۔ ان مثبت پہلوؤں کو عالمی سطح پر متعارف کروانا ضروری ہے۔

سردار یاسر الیاس کے مطابق فیسٹیول میں کم از کم 40 سے زائد ممالک کے سفیروں کی شرکت متوقع ہے۔ گزشتہ سال بھی غیر ملکی سفیروں نے اس نوعیت کی تقریبات میں شرکت کی تھی اور پاکستان کے پُرامن ماحول اور مہمان نوازی کو دیکھ کر خوشگوار حیرت کا اظہار کیا تھا۔

انہوں نے مزید کہا کہ موجودہ سیزن میں ایسے ایونٹس کا انعقاد پاکستان کی مہمان نوازی، ثقافت اور سیاحتی صلاحیتوں کو اجاگر کرنے کا بہترین موقع ہے۔ اسلام آباد شمالی علاقوں اور وفاقی دارالحکومت کے درمیان ایک اہم مرکز کی حیثیت رکھتا ہے، اس لیے یہ فیسٹیول ملک کے مختلف حصوں کے لوگوں کو ایک پلیٹ فارم پر جمع کرنے میں اہم کردار ادا کرے گا۔

فیسٹیول کے انعقاد کا مقصد نہ صرف مقامی سیاحت کو فروغ دینا ہے بلکہ بین الاقوامی سطح پر پاکستان کا مثبت تشخص پیش کرنا اور ملک میں سیاحتی سرگرمیوں کے نئے مواقع پیدا کرنا بھی ہے۔