اسرائیل خودمختاری کا احترام کرتے ہوئے لبنانی حدود سے نکل جائے: پاکستان

(نیویارک) پاکستان نے اقوام متحدہ کی سلامتی کونسل میں اسرائیل سے مطالبہ کیا ہے کہ وہ لبنان کی خودمختاری اور علاقائی سالمیت کا احترام کرتے ہوئے لبنانی حدود سے فوری طور پر انخلا کرے اور خطے میں کشیدگی بڑھانے والی کارروائیوں سے گریز کرے۔

یہ مطالبہ اقوام متحدہ میں پاکستان کے مستقل مندوب عاصم افتخار احمد نے لبنان کی صورت حال پر سلامتی کونسل کے ہنگامی اجلاس سے خطاب کرتے ہوئے کیا۔

پاکستانی مندوب نے کہا کہ اسرائیل اور لبنان کے درمیان جنگ بندی کے انتظامات اور براہ راست رابطوں کے باوجود لبنان میں سکیورٹی اور انسانی صورتحال مسلسل خراب ہو رہی ہے۔ ان کے مطابق اسرائیلی فوجی کارروائیوں اور لبنانی سرزمین میں زمینی دراندازی کے واقعات میں بھی نمایاں اضافہ دیکھنے میں آ رہا ہے۔

عاصم افتخار احمد نے کہا کہ لبنان کے تقریباً 20 فیصد رقبے، جو لگ بھگ 2 ہزار مربع کلومیٹر بنتا ہے، پر اسرائیل کا غیر قانونی قبضہ ہے جبکہ انخلا کے احکامات سے شہری آبادی کو شدید مشکلات اور انسانی بحران کا سامنا ہے۔

انہوں نے کہا کہ یہ وہی طرزِ عمل ہے جو دنیا دیگر تنازعات میں بھی دیکھ چکی ہے، جہاں اندھا دھند حملے، جبری نقل مکانی اور قبضے کی پالیسیوں نے انسانی المیوں کو جنم دیا۔

پاکستانی مندوب کے مطابق رواں سال مارچ سے اب تک لبنان میں خواتین اور بچوں سمیت 3 ہزار 400 سے زائد افراد ہلاک جبکہ 10 ہزار سے زیادہ زخمی ہو چکے ہیں۔ انہوں نے مزید بتایا کہ ایک ملین سے زائد افراد اپنے گھروں سے بے دخل ہو کر نقل مکانی پر مجبور ہوئے ہیں۔

عاصم افتخار احمد نے اسرائیل کی غیر ذمہ دارانہ فوجی کارروائیوں کی مذمت کرتے ہوئے کہا کہ پاکستان خطے میں کشیدگی کم کرنے اور امن کے قیام کے لیے کی جانے والی تمام سفارتی کوششوں کی حمایت کرتا ہے۔

انہوں نے لبنان اور اسرائیل کے درمیان جنگ بندی کے لیے امریکی سفارتی کوششوں کا خیرمقدم کرتے ہوئے کہا کہ پائیدار امن اور استحکام کا واحد راستہ مکالمہ، سفارت کاری اور بین الاقوامی قوانین کا احترام ہے۔

یہ بیان ایسے وقت میں سامنے آیا ہے جب خطے میں جنگ بندی کی مختلف کوششیں جاری ہیں اور عالمی برادری مشرق وسطیٰ میں بڑھتی ہوئی کشیدگی کو کم کرنے کے لیے سرگرم سفارتی رابطے کر رہی ہے۔