بنگلہ دیش کا پاکستان کو دوسرے ٹیسٹ میں بھی شکست دے کر تاریخی وائٹ واش، سیریز 0-2 سے اپنے نام

(سلہٹ) بنگلہ دیش نے شاندار کارکردگی کا مظاہرہ کرتے ہوئے پاکستان کو دوسرے ٹیسٹ میچ میں 78 رنز سے شکست دے کر دو میچوں کی سیریز میں تاریخی وائٹ واش مکمل کر لیا۔ پاکستان کی ٹیم 437 رنز کے مشکل ہدف کے تعاقب میں دوسری اننگز میں 358 رنز بنا کر آؤٹ ہو گئی۔

پاکستان کی جانب سے محمد رضوان نے ذمہ دارانہ بیٹنگ کرتے ہوئے 94 رنز کی نمایاں اننگز کھیلی، تاہم وہ ٹیم کو شکست سے نہ بچا سکے۔ قومی ٹیم کے کپتان شان مسعود بطور ٹیسٹ کپتان بارہویں شکست کے بعد شدید تنقید کی زد میں آ گئے ہیں۔

میچ میں بنگلہ دیش نے پہلی اننگز میں 278 اور دوسری اننگز میں 390 رنز اسکور کیے، جبکہ پاکستان پہلی اننگز میں 232 اور دوسری اننگز میں 358 رنز بنا سکا۔

بنگلہ دیش کے تجربہ کار بیٹر مشفیق الرحیم نے دوسری اننگز میں شاندار سنچری اسکور کر کے اپنی ٹیم کی پوزیشن مستحکم کی۔ دوسری جانب اسپنر تیج الاسلام نے دونوں اننگز میں مجموعی طور پر 9 وکٹیں حاصل کر کے پاکستانی بیٹنگ لائن کو مشکلات سے دوچار رکھا۔

وکٹ کیپر بیٹر لٹن داس نے پہلی اننگز میں 126 اور دوسری اننگز میں 69 رنز کی اہم اننگز کھیلیں، جس پر انہیں پلیئر آف دی میچ قرار دیا گیا۔

یہ دوسری مرتبہ ہے کہ بنگلہ دیش نے پاکستان کو ٹیسٹ سیریز میں وائٹ واش کیا ہے۔ اس سے قبل بھی بنگلہ دیش پاکستان کے خلاف تاریخی کامیابی حاصل کر چکا ہے، جس کے بعد پاکستانی ٹیم کی کارکردگی پر سوالات مزید بڑھ گئے ہیں۔