امریکا میں پاکستانی سفیر کی ورلڈ بینک صدر اجے بنگا سے ملاقات، فیفا ورلڈ کپ 2026 کا پاکستانی آفیشل فٹ بال "ٹرائیونڈا" تحفے میں پیش

واشنگٹن: امریکا میں پاکستان کے سفیر رضوان سعید شیخ نے ورلڈ بینک کے صدر اجے بنگا سے ملاقات کی، جس میں پاکستان اور ورلڈ بینک کے درمیان دیرینہ شراکت داری، جاری ترقیاتی منصوبوں اور باہمی تعاون کے فروغ پر تبادلۂ خیال کیا گیا۔

ملاقات کے دوران سفیر پاکستان نے ورلڈ بینک کے صدر کو فیفا ورلڈ کپ 2026 کے لیے پاکستان میں تیار کیا گیا آفیشل فٹ بال "ٹرائیونڈا" بطور تحفہ پیش کیا۔

ورلڈ بینک کے صدر اجے بنگا نے پاکستان میں تیار کردہ اعلیٰ معیار کی اسپورٹس مصنوعات، خصوصاً ٹرائیونڈا فٹ بال کی تعریف کرتے ہوئے پاکستان کی اس شعبے میں مہارت اور عالمی معیار کو سراہا۔

اس موقع پر سفیر پاکستان رضوان سعید شیخ نے کہا کہ پاکستان کھیلوں کے ذریعے دنیا بھر کے ممالک اور عوام کو ایک دوسرے کے قریب لانے میں مثبت کردار ادا کر رہا ہے۔ انہوں نے کہا کہ فیفا ورلڈ کپ 2026 کے لیے پاکستان میں تیار کردہ آفیشل فٹ بال کا انتخاب ملک کے لیے اعزاز، فخر اور عالمی اعتماد کا مظہر ہے۔

انہوں نے کہا کہ معیاری اسپورٹس مصنوعات کی تیاری کے حوالے سے سیالکوٹ عالمی سطح پر ممتاز مقام رکھتا ہے اور پاکستان کی اسپورٹس انڈسٹری بین الاقوامی معیار کے مطابق مصنوعات تیار کر رہی ہے۔

رضوان سعید شیخ نے مزید کہا کہ عالمی برادری کا پاکستان کی اسپورٹس صنعت پر اعتماد اور تعاون اس شعبے کی ترقی کے لیے انتہائی حوصلہ افزا ہے۔

انہوں نے ورلڈ بینک کے ساتھ پاکستان کی طویل المدت شراکت داری کی اہمیت پر زور دیتے ہوئے کہا کہ جاری اور مستقبل کے ترقیاتی منصوبوں کو باہمی تعاون کے ذریعے مزید مؤثر اور نتیجہ خیز بنانا دونوں فریقوں کی مشترکہ ترجیح ہے۔