مبینہ پاکستانی شہری پر امریکی پوسٹل سروس کو 12 کروڑ 60 لاکھ ڈالر نقصان پہنچانے کا الزام

امریکی ریاست فلوریڈا میں ایک مبینہ پاکستانی شہری کے خلاف امریکی پوسٹل سروس کو 12 کروڑ 60 لاکھ ڈالر کا نقصان پہنچانے کے الزام میں فرد جرم عائد کردی گئی۔

امریکی حکام کے مطابق خانیوال سے تعلق رکھنے والے 33 سالہ فہیم اکرم پر الزام ہے کہ وہ ایک ایسی ویب سائٹ چلا رہا تھا جس کے ذریعے امریکی پوسٹل سروس کے جعلی ڈاک لیبل یا ٹکٹ فروخت کیے جاتے تھے۔

امریکی اٹارنی کے دفتر کے مطابق ملزم مبینہ طور پر ڈاک کے وزن یا منزل کو مدنظر رکھے بغیر ہر جعلی ٹکٹ صرف 2 ڈالر میں فروخت کرتا تھا، جو امریکی پوسٹل سروس کے اصل ڈاک ٹکٹ کی قیمت سے نمایاں طور پر کم تھی۔

حکام کے مطابق مبینہ طور پر اس ویب سائٹ کے ذریعے تقریباً 51 لاکھ جعلی ڈاک ٹکٹ فروخت کیے گئے۔

تفتیش میں یہ بھی سامنے آیا کہ تقریباً 5 ہزار 200 افراد نے اپنے سامان کی ترسیل کے لیے مبینہ جعلی ویب سائٹ سے ڈاک ٹکٹ خریدے، جس کے نتیجے میں امریکی پوسٹل سروس کو 12 کروڑ 60 لاکھ ڈالر کا نقصان پہنچا۔

امریکی حکام کے مطابق مبینہ جعلی ڈاک ٹکٹ فروخت کرنے والی ویب سائٹ کو اب بند کر دیا گیا ہے۔

امریکی پوسٹل انسپیکشن سروس کے انسپکٹر انچارج نے کہا کہ امریکی حکام کی رسائی ملک کی سرحدوں سے باہر تک ہے اور امریکی پوسٹل سروس سے فراڈ کرنے والوں کو تلاش کرکے انصاف کے کٹہرے میں لایا جائے گا۔

امریکی پوسٹل انسپیکشن سروس نے فہیم اکرم کی گرفتاری سے متعلق قابلِ عمل اطلاع فراہم کرنے والے شخص کے لیے ایک لاکھ امریکی ڈالر انعام کا اعلان بھی کیا ہے۔

امریکی حکام کے مطابق اگر فہیم اکرم پر عائد الزامات عدالت میں ثابت ہوجاتے ہیں تو اسے سازش اور جعلی ڈاک ٹکٹ بنانے کے الزام میں زیادہ سے زیادہ 5 سال جبکہ آن لائن فراڈ کے الزام میں 20 سال تک قید کی سزا ہوسکتی ہے۔

واضح رہے کہ فرد جرم میں عائد الزامات عدالت میں ثابت ہونا باقی ہیں اور ملزم کو جرم ثابت ہونے تک بے گناہ تصور کیا جاتا ہے۔