درخواست مسترد، وزیراعلیٰ خیبرپختونخوا کے وارنٹ گرفتاری برقرار

اسلام آباد: انسداد دہشت گردی عدالت اسلام آباد نے 26 نومبر احتجاج کیس میں وزیراعلیٰ خیبرپختونخوا سہیل آفریدی سمیت دیگر ملزمان کے وارنٹ گرفتاری برقرار رکھتے ہوئے پیش نہ ہونے والے ملزمان کی جانب سے دائر استثنیٰ کی درخواستیں مسترد کردی ہیں۔

انسداد دہشت گردی عدالت کے جج طاہر عباس سپرا نے کیس کی سماعت کی، جس میں عدالت نے وزیراعلیٰ سہیل آفریدی، جنید اکبر اور دیگر ملزمان کے وارنٹ گرفتاری برقرار رکھنے کا حکم دیا۔

عدالت نے پیش نہ ہونے والے ملزمان کی جانب سے حاضری سے استثنیٰ کی درخواستیں مسترد کرتے ہوئے ان کے خلاف اشتہاری قرار دینے کی کارروائی بھی جاری رکھنے کی ہدایت کردی۔

چالان جلد پیش کرنے کی ہدایت

انسداد دہشت گردی عدالت نے پولیس کو وزیراعلیٰ سہیل آفریدی اور دیگر ملزمان کے خلاف مقدمے کا چالان جلد پیش کرنے کی ہدایت کی ہے۔

عدالت نے کیس کی مزید سماعت 30 ستمبر تک ملتوی کردی۔

تھانہ مارگلہ میں مقدمہ درج

واضح رہے کہ وزیراعلیٰ خیبرپختونخوا سہیل آفریدی، جنید اکبر اور دیگر افراد کے خلاف 26 نومبر احتجاج سے متعلق مقدمہ اسلام آباد کے تھانہ مارگلہ میں درج ہے۔

عدالت کی جانب سے ملزمان کے وارنٹ گرفتاری برقرار رکھنے کے بعد کیس میں قانونی کارروائی مزید آگے بڑھنے کا امکان ہے۔