حکومت کا بڑا ریلیف: پیٹرول اور ڈیزل 22 روپے فی لیٹر سستا، نئی قیمتیں جاری

اسلام آباد: وفاقی حکومت نے عوام کو عید کا تحفہ دیتے ہوئے پیٹرول اور ہائی اسپیڈ ڈیزل کی قیمتوں میں 22، 22 روپے فی لیٹر کمی کا اعلان کر دیا ہے۔

اعلان کے مطابق کمی کے بعد پیٹرول کی نئی قیمت 381 روپے 78 پیسے فی لیٹر جبکہ ہائی اسپیڈ ڈیزل کی نئی قیمت 380 روپے 78 پیسے فی لیٹر مقرر کی گئی ہے۔ نئی قیمتوں کا اطلاق رات 12 بجے سے آئندہ ایک ہفتے کے لیے ہوگا۔

وزیراعظم آفس کی جانب سے جاری اعلامیے میں کہا گیا ہے کہ حکومت سخت ترین معاشی حالات کے باوجود عوام کو مسلسل ریلیف فراہم کر رہی ہے، جبکہ گزشتہ ہفتے بھی پیٹرولیم مصنوعات کی قیمتوں میں کمی کی گئی تھی۔

اعلامیے میں کہا گیا کہ وزیراعظم شہباز شریف نے قوم سے وعدہ کیا تھا کہ جیسے ہی معاشی گنجائش پیدا ہوگی، عوام کو ریلیف دیا جائے گا، اور حکومت نے اپنے اس وعدے پر مکمل عمل کیا ہے۔

وزیراعظم آفس کے مطابق عالمی سطح پر تیل کے شدید بحران کے باوجود حکومت نے بروقت اقدامات کیے، جس کے باعث ملک میں پیٹرول اور ڈیزل کی فراہمی برقرار رہی۔ اعلامیے میں کہا گیا کہ حکومت نے 130 روپے سے زائد سبسڈی دے کر تیل کی قیمتوں میں اضافے کا بوجھ عوام پر منتقل ہونے سے روکا۔

اعلامیے کے مطابق پیٹرول پر سبسڈی کی مد میں عوام کو خاطر خواہ ریلیف فراہم کیا گیا، جبکہ پبلک ٹرانسپورٹ، گڈز ٹرانسپورٹ، موٹرسائیکل اور رکشہ چلانے والوں کو بھی فیول سبسڈی دی گئی۔

وزیراعظم شہباز شریف کا کہنا ہے کہ عوام کو ریلیف فراہم کرنا حکومت کی اولین ترجیحات میں شامل ہے اور حکومت مہنگائی کے اثرات کم کرنے کے لیے تمام ممکنہ اقدامات جاری رکھے گی۔