پمز ہسپتال واقعہ: وزیراعظم نے وفاقی سیکرٹری صحت اسلم غوری کو عہدے سے ہٹا دیا

اسلام آباد: وزیراعظم محمد شہباز شریف نے پمز ہسپتال کی نرسری میں آتشزدگی کے اندوہناک واقعے میں 14 نومولود بچوں کی اموات پر وفاقی سیکرٹری صحت اسلم غوری کو فوری طور پر معطل کرکے عہدے سے ہٹا دیا۔

وزیراعظم شہباز شریف کی زیر صدارت پمز ہسپتال آتشزدگی کے واقعے پر اعلیٰ سطح کا اجلاس ہوا، جس میں متعلقہ حکام اور افسران کی جانب سے کیے گئے انتظامات کا جائزہ لیا گیا۔ وزیراعظم نے واقعے پر شدید برہمی کا اظہار کرتے ہوئے ذمہ داران کے تعین اور سخت کارروائی کی ہدایت کی۔

اجلاس کے دوران وزیراعظم نے وفاقی سیکرٹری صحت اسلم غوری کو فوری طور پر معطل کرکے عہدے سے ہٹانے کا حکم دیا، جبکہ وفاقی وزیر صحت مصطفیٰ کمال کو بھی فوری طور پر اسلام آباد پہنچنے کی ہدایت کی۔

وزیراعظم نے واقعے کی اعلیٰ سطح پر تحقیقات کے لیے انکوائری کمیٹی بھی تشکیل دے دی۔ سابق سیکرٹری داخلہ شاہد خان کو کمیٹی کا سربراہ مقرر کیا گیا ہے، جبکہ سیکرٹری اسٹیبلشمنٹ ڈاکٹر بیرسٹر نویل اعوان سمیت دیگر ارکان بھی کمیٹی میں شامل ہیں۔

اس سے قبل وزیراعظم شہباز شریف نے پمز ہسپتال کی نرسری میں آتشزدگی کے نتیجے میں 14 نومولود بچوں کے جاں بحق ہونے پر گہرے دکھ اور افسوس کا اظہار کیا تھا۔

وزیراعظم نے واقعے کا نوٹس لیتے ہوئے حکام کو فوری تحقیقات کی ہدایت کی اور کہا کہ بچوں کے ساتھ اس نوعیت کا افسوسناک واقعہ ناقابلِ تلافی ہے۔ انہوں نے واقعے کے محرکات کا تفصیلی جائزہ لینے، ذمہ داران کا تعین کرنے اور ان کے خلاف سخت کارروائی عمل میں لانے کی ہدایت کی۔

شہباز شریف نے جاں بحق بچوں کے لواحقین سے دلی تعزیت اور ہمدردی کا اظہار کرتے ہوئے کہا کہ اس اندوہناک سانحے پر ان کا دل رنجیدہ ہے اور وہ غمزدہ والدین کے دکھ میں برابر کے شریک ہیں۔ انہوں نے دعا کی کہ اللہ تعالیٰ غمزدہ خاندانوں کو صبرِ جمیل عطا فرمائے۔