وزیراعظم شہباز شریف کی حج انتظامات بہتر بنانے اور مون سون تیاریوں کی ہدایت

وزیراعظم شہباز شریف سے وفاقی وزیر مذہبی امور سردار یوسف اور وزیر ماحولیاتی تبدیلی مصدق ملک نے الگ الگ ملاقاتیں کیں، جن میں حج انتظامات اور رواں برس مون سون کی تیاریوں پر تفصیلی بریفنگ دی گئی۔

وفاقی وزیر مذہبی امور سردار یوسف نے وزیراعظم کو جاری حج آپریشن اور عازمین کیلئے کیے گئے انتظامات سے آگاہ کیا۔ اس موقع پر وزیراعظم نے کہا کہ عازمین حج اللہ تعالیٰ کے مہمان ہیں، انہیں ہر ممکن سہولت فراہم کی جائے۔

وزیراعظم نے ہدایت کی کہ سعودی عرب میں پاکستانی حج مشن مکمل ذمہ داری اور مستعدی کے ساتھ خدمات انجام دے، جبکہ پاکستانی ایئرپورٹس پر بھی عازمین حج کیلئے سہولتوں کو یقینی بنایا جائے۔

دوسری جانب وزیر ماحولیاتی تبدیلی مصدق ملک نے وزیراعظم کو رواں سال مون سون سیزن سے نمٹنے کیلئے حکومتی تیاریوں پر بریفنگ دی۔ انہیں پہاڑی علاقوں میں گلاف اور فلیش فلڈز کی پیشگی اطلاع دینے والے نظام کی تنصیب کے بارے میں بھی آگاہ کیا گیا۔

وزیراعظم شہباز شریف نے ہدایت کی کہ پیشگی وارننگ سسٹم کو مزید مؤثر اور فعال بنایا جائے تاکہ ممکنہ سیلابی صورتحال اور قدرتی آفات سے بروقت نمٹا جا سکے۔ انہوں نے متعلقہ اداروں کو مسلسل مانیٹرنگ اور عوامی تحفظ کیلئے مکمل تیاری رکھنے کی بھی ہدایت دی۔