آج سے 3 جولائی تک پری مون سون بارشوں کی پیش گوئی، این ڈی ایم اے نے الرٹ جاری کر دیا

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے آج سے 3 جولائی تک ملک کے مختلف علاقوں میں وقفے وقفے سے پری مون سون بارشوں کی پیش گوئی کرتے ہوئے متعلقہ اداروں اور شہریوں کو احتیاطی تدابیر اختیار کرنے کی ہدایت جاری کر دی ہے۔

این ڈی ایم اے کے مطابق شدید گرمی اور متوقع پری مون سون بارشوں کے باعث شمالی علاقوں میں گلیشیئرز کے تیزی سے پگھلنے کا خدشہ ہے، جس کے نتیجے میں گلگت بلتستان، خیبرپختونخوا اور آزاد کشمیر کے مختلف علاقوں میں دریاؤں اور ندی نالوں میں پانی کی سطح اچانک بلند ہو سکتی ہے۔

ادارے نے خبردار کیا ہے کہ گلیشیائی جھیلیں پھٹنے اچانک سیلاب اور لینڈ سلائیڈنگ جیسے خطرات بھی پیدا ہو سکتے ہیں، جس سے حساس علاقوں میں رہنے والے افراد اور سیاح متاثر ہو سکتے ہیں۔

این ڈی ایم اے نے ہنزہ، نگر، غذر، اسکردو، شگر، گانچھے، کھرمنگ، استور، دیامر، اپر و لوئر چترال اور سوات سمیت دیگر حساس علاقوں کے رہائشیوں، سیاحوں اور مسافروں کو خصوصی احتیاط برتنے کی ہدایت کی ہے۔

اعلامیے کے مطابق شہری دریاؤں، ندی نالوں، گلیشیائی جھیلوں اور دریا کے کناروں کے قریب غیر ضروری نقل و حرکت سے گریز کریں، جبکہ کسی بھی غیر معمولی صورتحال کی فوری اطلاع مقامی انتظامیہ کو دیں۔

این ڈی ایم اے نے صوبائی ڈیزاسٹر مینجمنٹ اتھارٹیز کو بھی ممکنہ ہنگامی صورتحال سے نمٹنے کے لیے مکمل طور پر الرٹ رہنے اور پیشگی انتظامات یقینی بنانے کی ہدایت جاری کر دی ہے۔