صوبوں کے معاملے پر قومی اسمبلی میں بحث ہونی چاہیے: بلاول بھٹو

(لندن ) پاکستان پیپلزپارٹی کے چیئرمین بلاول بھٹو زرداری نے کہا ہے کہ صوبوں کے معاملے اور ملکی نظام سے متعلق اہم امور پر بزنس فورمز کے بجائے قومی اسمبلی میں باقاعدہ بحث ہونی چاہیے۔

لندن میں میڈیا سے گفتگو کرتے ہوئے بلاول بھٹو نے کہا کہ صوبوں کے حوالے سے پیپلزپارٹی کا مؤقف واضح ہے۔ اگر موجودہ نظام ناکام ہوا ہے تو اس کی وجوہات اور ممکنہ حل پر قومی اسمبلی میں کھل کر بحث ہونی چاہیے۔

ان کا کہنا تھا کہ پاکستان کے مسائل کا حل کوئی ایک سیاسی جماعت نہیں نکال سکتی، ملک کے تمام مسائل کا حل جمہوریت میں ہے اور تمام سیاسی جماعتوں کو قومی اور عوامی معاملات میں اپنا کردار ادا کرنا چاہیے۔

بلاول بھٹو نے کہا کہ محسن نقوی کو اپنی رائے دینے کا حق ہے، تاہم ان کا مطالبہ ہے کہ اس اہم معاملے پر پارلیمان میں بحث کی جائے۔ انہوں نے کہا کہ محسن نقوی پارلیمان میں کم آتے ہیں، انہیں بزنس فورم کے بجائے پارلیمان میں آکر اپنا مؤقف پیش کرنا چاہیے۔

پیپلزپارٹی کے چیئرمین نے سوال اٹھایا کہ موجودہ نظام میں مسائل کیوں پیدا ہوئے اور ان کا حل کیا ہے؟ ان کا کہنا تھا کہ یہ قابل قبول نہیں کہ ملک کی قسمت کے فیصلے چند کاروباری شخصیات کریں، بلکہ قومی معاملات پر سیاسی جماعتوں اور پارلیمان کو اعتماد میں لیا جانا چاہیے۔

بلاول بھٹو نے آزاد کشمیر کے انتخابات سے متعلق بھی اپنے تحفظات کا اظہار کیا۔ انہوں نے کہا کہ پیپلزپارٹی چاہتی ہے کہ انتخابی اصلاحات کے لیے پارلیمان کی کمیٹی تشکیل دی جائے تاکہ آئندہ انتخابات صاف، شفاف اور قابل اعتماد طریقے سے منعقد ہوں۔