قومی اسمبلی میں پی ٹی آئی ارکان آپس میں الجھ پڑے، جنید اکبر اور اقبال آفریدی میں ہاتھا پائی

(اسلام آباد) پاکستان تحریک انصاف کے ارکان کے درمیان قومی اسمبلی کے اجلاس کے دوران تلخ کلامی ہاتھا پائی تک جا پہنچی۔

تفصیلات کے مطابق اقبال آفریدی نے بات کرنے کی اجازت نہ ملنے پر کورم کی نشاندہی کی، جس کے بعد ڈپٹی اسپیکر نے اجلاس ملتوی کر دیا۔

اجلاس اچانک ملتوی ہونے پر جنید اکبر اور دیگر پی ٹی آئی ارکان اقبال آفریدی پر برہم ہو گئے، جس کے بعد ایوان میں دونوں رہنماؤں کے درمیان شدید تلخ کلامی ہوئی۔

صورتحال اس وقت مزید کشیدہ ہو گئی جب جنید اکبر اور اقبال آفریدی کے درمیان ہاتھا پائی شروع ہو گئی، تاہم دیگر ارکان نے فوری مداخلت کرتے ہوئے دونوں رہنماؤں کو الگ کرایا اور معاملہ ٹھنڈا کرایا۔

واقعے کے بعد قومی اسمبلی میں کچھ دیر کیلئے ہنگامہ آرائی اور کشیدگی کا ماحول دیکھنے میں آیا۔