ایران پر ایک اور حملے کیلئے تیار ہیں، نئی مہم زیادہ دیر نہیں چلے گی: ٹرمپ

واشنگٹن: امریکی صدر ڈونلڈ ٹرمپ نے ایران کے خلاف مزید فوجی کارروائی کا عندیہ دیتے ہوئے کہا ہے کہ امریکا ایران پر ایک اور حملے کے لیے تیار ہے اور نئی مہم زیادہ دیر تک جاری نہیں رہے گی۔

وائٹ ہاؤس میں میڈیا سے گفتگو کرتے ہوئے صدر ٹرمپ نے دعویٰ کیا کہ ایرانی حکومت وقت کے ساتھ کمزور ہوتی جا رہی ہے اور امریکا ایران میں حیرت انگیز نتائج حاصل کر رہا ہے۔

انہوں نے کہا کہ امریکا ایران کو جوہری ہتھیار حاصل کرنے کی اجازت نہیں دے گا۔ ان کے مطابق ایران اپنے ریڈار اور میزائل نظام کو دوبارہ فعال اور مضبوط بنانے کی کوشش کر رہا تھا، تاہم امریکا ایران کی تمام سرگرمیوں پر گہری نظر رکھے ہوئے ہے۔

صدر ٹرمپ نے مزید دعویٰ کیا کہ ایرانی عوام جلد اپنی حکومت کے خلاف اٹھ کھڑے ہوں گے اور وہ مزید حکومتی جبر برداشت نہیں کریں گے۔

آبنائے ہرمز پر مکمل کنٹرول کا دعویٰ

امریکی صدر نے آبنائے ہرمز کے حوالے سے بھی اہم دعویٰ کرتے ہوئے کہا کہ امریکا کا اس اہم آبی گزرگاہ پر مکمل کنٹرول ہے۔

ٹرمپ نے ایران میں ہونے والے مظاہروں کا ذکر کرتے ہوئے دعویٰ کیا کہ ایران میں 65 ہزار مظاہرین ہلاک ہو چکے ہیں۔ انہوں نے الزام عائد کیا کہ ایرانی سیکیورٹی فورسز مظاہرین کو براہِ راست گولیوں کا نشانہ بناتی ہیں۔

صدر ٹرمپ کے تازہ بیانات ایسے وقت میں سامنے آئے ہیں جب امریکا اور ایران کے درمیان کشیدگی میں اضافہ جاری ہے، جبکہ خطے میں کسی بھی نئی فوجی کارروائی کے نتیجے میں صورتحال مزید سنگین ہونے کے خدشات ظاہر کیے جا رہے ہیں۔