امن اور خوشحالی کے لیے تنازعات کا حل مذاکرات اور سفارتکاری سے ممکن ہے: اسحاق ڈار

اسلام آباد: نائب وزیراعظم اور وزیر خارجہ اسحاق ڈار نے کہا ہے کہ خطے اور دنیا کو درپیش پیچیدہ چیلنجز کے تناظر میں مارگلہ ڈائیلاگ کا انعقاد انتہائی اہمیت کا حامل ہے۔ عالمی امن اور خوشحالی کے لیے تنازعات کو مذاکرات اور سفارتکاری کے ذریعے حل کرنا ضروری ہے جبکہ مشترکہ عالمی مسائل سے نمٹنے کے لیے باہمی تعاون اور کثیرالجہتی سفارتکاری کو فروغ دینا ہوگا۔

مارگلہ ڈائیلاگ سے خطاب کرتے ہوئے اسحاق ڈار نے کہا کہ عالمی نظام تیزی سے تبدیلیوں سے گزر رہا ہے اور بین الاقوامی سلامتی کا ڈھانچہ اس وقت شدید دباؤ کا شکار ہے۔ عالمی قوانین کا غیر منصفانہ اور غیر یکساں اطلاق بین الاقوامی سطح پر تفریق کو جنم دیتا ہے، جس سے مختلف ممالک کی سلامتی بھی متاثر ہوتی ہے۔

نائب وزیراعظم نے کہا کہ اقوام متحدہ سمیت عالمی اداروں کو موجودہ چیلنجز سے نمٹنے کے لیے زیادہ مؤثر کردار ادا کرنا ہوگا۔ سیاسی اختلافات اور عالمی طاقتوں کے درمیان کشمکش کے باعث کثیرالجہتی اداروں کی کارکردگی متاثر ہو رہی ہے، جبکہ طاقت کے استعمال سے سفارتکاری کے امکانات محدود اور تصادم کے خطرات میں اضافہ ہو رہا ہے۔

اسحاق ڈار کا کہنا تھا کہ پاکستان تمام تنازعات کے پُرامن حل کا بھرپور حامی ہے۔ عالمی طاقتوں کے درمیان بڑھتی ہوئی کشیدگی غلط اندازوں اور تصادم کے خطرات کو جنم دے رہی ہے، اس لیے موجودہ حالات میں مذاکرات اور سفارتی کوششوں کے لیے مزید گنجائش پیدا کرنے کی ضرورت ہے۔

انہوں نے کہا کہ عالمی معیشت، جغرافیائی سیاست اور مالیاتی معاملات ایک دوسرے سے تیزی سے منسلک ہو رہے ہیں۔ تجارت، ٹیکنالوجی، توانائی اور سرمایہ کاری تک رسائی کے شعبوں میں مسابقت کے اثرات بھی بڑھتے جا رہے ہیں، جس کے باعث ممالک کو اپنی پالیسیوں اور ترجیحات کا ازسرنو جائزہ لینا پڑ رہا ہے۔

نائب وزیراعظم نے مزید کہا کہ ابھرتی ہوئی ٹیکنالوجیز دنیا بھر میں نئے مواقع پیدا کر رہی ہیں، تاہم ان تبدیلیوں کے ساتھ نئے چیلنجز بھی سامنے آرہے ہیں۔ قومی سلامتی اور عوام کی خوشحالی یقینی بنانے کے لیے اندرونی استحکام، مضبوط معیشت اور مؤثر سفارتکاری ناگزیر ہیں۔

اسحاق ڈار نے اپنے خطاب میں اس امید کا اظہار کیا کہ مشترکہ کوششوں، بین الاقوامی تعاون اور اصولوں پر مبنی سفارتکاری کے ذریعے عالمی چیلنجز کا مقابلہ کیا جاسکتا ہے، تاہم ابھرتے ہوئے عالمی نظام کی حتمی شکل ابھی غیر یقینی ہے۔