خوزستان میں امریکی حملوں میں 3 ایرانی اہلکار ہلاک، پاسدارانِ انقلاب کا سخت ردعمل، آبنائے ہرمز پر جواب دینے کا اعلان

ایرانی پاسدارانِ انقلاب نے دعویٰ کیا ہے کہ صوبہ خوزستان میں امریکی حملوں کے نتیجے میں ان کے تین اہلکار ہلاک ہو گئے ہیں، جبکہ امریکہ کی کارروائیوں کو خطے کے امن و استحکام کے لیے سنگین خطرہ قرار دیا ہے۔

پاسدارانِ انقلاب کی جانب سے جاری بیان میں کہا گیا کہ آبنائے ہرمز میں امریکی مداخلت کا فیصلہ کن جواب دیا جائے گا۔ بیان کے مطابق امریکی فوجی اقدامات سے آبنائے ہرمز کو دوبارہ کھولنے کی جاری کوششیں بھی متاثر ہو سکتی ہیں۔

بیان میں مزید کہا گیا کہ امریکہ کی حالیہ کارروائیاں نہ صرف مشرق وسطیٰ کی سیکیورٹی بلکہ آبنائے ہرمز سے وابستہ ممالک کے اقتصادی اور تجارتی مفادات کے لیے بھی خطرہ بن سکتی ہیں۔

پاسدارانِ انقلاب نے امریکی حملوں کو خطے کے استحکام کے خلاف قرار دیتے ہوئے کہا کہ ایران اپنے قومی مفادات اور سلامتی کے تحفظ کے لیے مناسب ردعمل دینے کا حق محفوظ رکھتا ہے۔

امریکی حملوں اور ایرانی ردعمل کے بعد خطے میں کشیدگی میں مزید اضافے کا خدشہ ظاہر کیا جا رہا ہے، جبکہ عالمی برادری صورتحال پر گہری نظر رکھے ہوئے ہے۔