فیلڈ مارشل عاصم منیر سے روسی وزیر داخلہ کی ملاقات، سکیورٹی تعاون مزید مضبوط بنانے پر اتفاق

راولپنڈی: روس کے وزیر داخلہ ولادیمیر کولوکولتسیف نے جنرل ہیڈکوارٹرز (جی ایچ کیو) راولپنڈی کا دورہ کیا، جہاں انہوں نے چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے ملاقات کی۔ ملاقات میں پاکستان اور روس کے درمیان سکیورٹی تعاون کو مزید مضبوط بنانے اور دونوں ممالک کے اداروں کے درمیان روابط بڑھانے پر اتفاق کیا گیا۔

پاک فوج کے شعبۂ تعلقاتِ عامہ (آئی ایس پی آر) کے مطابق ملاقات میں باہمی دلچسپی کے امور، علاقائی سکیورٹی کی صورتِ حال اور دوطرفہ تعاون پر تبادلہ خیال کیا گیا۔ دونوں جانب سے سکیورٹی سمیت مشترکہ مفادات کے مختلف شعبوں میں عملی تعاون بڑھانے کے عزم کا اظہار کیا گیا۔

ملاقات کے دوران پاکستان اور روس کے سکیورٹی اداروں کے درمیان قریبی روابط کے فروغ اور رابطہ کاری کو مزید مؤثر بنانے کی اہمیت پر بھی زور دیا گیا۔

اس موقع پر فیلڈ مارشل سید عاصم منیر نے روس کے ساتھ پاکستان کے دیرینہ تعلقات کو مزید مستحکم بنانے کے عزم کا اعادہ کیا۔

روسی وزیر داخلہ کا پاک فوج کی قربانیوں کا اعتراف

آئی ایس پی آر کے مطابق روسی وزیر داخلہ ولادیمیر کولوکولتسیف نے علاقائی امن و استحکام کے لیے پاکستان کی کوششوں کو سراہا اور دہشت گردی کے خلاف جنگ میں پاک افواج کی پیشہ ورانہ صلاحیتوں اور قربانیوں کا اعتراف کیا۔

ملاقات میں اس بات پر خصوصی توجہ دی گئی کہ پاکستان اور روس کے درمیان سکیورٹی تعاون اور ادارہ جاتی روابط کو مزید مؤثر بنایا جائے، تاکہ مشترکہ مفادات کے تحفظ اور علاقائی استحکام کے لیے باہمی تعاون کو فروغ دیا جا سکے۔