سلمان خان کترینہ کیف کے دفاع میں آگئے، وزن پر تنقید کرنے والوں کو جواب دے دیا

بالی ووڈ سپر اسٹار سلمان خان نے ساتھی اداکارہ کترینہ کیف کا نام لیے بغیر ماں بننے کے بعد ان کے وزن میں اضافے پر سوشل میڈیا پر ہونے والے نامناسب تبصروں پر تنقید کی ہے۔

اپنے رئیلٹی شو ’بگ باس 20‘ کی حالیہ قسط میں سلمان خان نے کہا کہ بعض لوگ سوشل میڈیا سے آمدنی حاصل کرنے کے لیے مشہور شخصیات کی ذاتی زندگی اور ظاہری شکل کو تنقید کا نشانہ بناتے ہیں۔

اداکار کے مطابق کسی کو نیچا دکھا کر پیسہ کمانا ایسے افراد کی سوچ اور تربیت کی عکاسی کرتا ہے۔ انہوں نے کہا کہ مشہور شخصیات کو وزن، جسمانی ساخت، شکل و صورت، خاندان، پیشہ ورانہ ناکامیوں اور ماں بننے جیسے ذاتی معاملات پر بھی تنقید کا سامنا کرنا پڑتا ہے۔

سلمان خان نے کہا کہ ماں بننے کے بعد وزن میں اضافہ ایک فطری عمل ہے اور اداکارہ جب فلموں میں واپسی کریں گی تو دوبارہ خود کو فٹ کرلیں گی۔

انہوں نے سوال اٹھایا کہ جو لوگ خود اپنی ظاہری شکل و صورت کے حوالے سے عدم اطمینان کا شکار ہوتے ہیں، وہ دوسروں کے وزن اور حلیے پر تنقید کرنے کو اپنا حق کیسے سمجھتے ہیں۔

سلمان خان نے خود پر ہونے والی سوشل میڈیا ٹرولنگ کا ذکر کرتے ہوئے کہا کہ عمر بڑھنے کے ساتھ انہیں بھی تنقید کا سامنا کرنا پڑتا ہے۔ ان کا کہنا تھا کہ وہ 60 برس کے ہوچکے ہیں، اس لیے ہمیشہ ’میں نے پیار کیا‘ کے ہیرو کی طرح نظر نہیں آسکتے۔