سلمان خان مداح کے پاؤں پر گاڑی چڑھنے پر ڈرائیور پر برہم، ویڈیو وائرل

ممبئی: بالی ووڈ کے معروف اداکار سلمان خان کی ایک ویڈیو سوشل میڈیا پر وائرل ہوگئی، جس میں وہ مداح کے پاؤں پر گاڑی چڑھنے کے واقعے کے بعد ڈرائیور پر برہم دکھائی دے رہے ہیں۔

سلمان خان سیاسی رہنما آشیش شیلار کی رہائش گاہ پر ایک تقریب میں شرکت کے لیے پہنچے تھے، جہاں مداحوں کی بڑی تعداد نے ان کی گاڑی کو گھیر لیا۔ سیکیورٹی اہلکار ہجوم کو پیچھے ہٹانے اور گاڑی کے لیے راستہ بنانے کی کوشش کرتے رہے۔

وائرل ویڈیو کے مطابق ڈرائیور نے ہجوم کے درمیان سے گاڑی آگے بڑھانے کی کوشش کی تو ایک مداح کا پاؤں گاڑی کے نیچے آگیا، جس سے وہ تکلیف میں مبتلا ہوگیا۔

صورتحال دیکھ کر سلمان خان ڈرائیور پر برہم ہوگئے۔ ویڈیو میں انہیں ڈرائیور کو ڈانٹتے اور اس کے ہاتھ پر ہاتھ مارتے دیکھا جاسکتا ہے۔ سلمان خان نے ڈرائیور کو گاڑی ہجوم سے دور لے جانے کی ہدایت بھی کی۔

واقعے کی ویڈیو سامنے آنے کے بعد سوشل میڈیا صارفین نے ملے جلے ردعمل کا اظہار کیا۔ بعض صارفین نے سلمان خان کی مداخلت کو مداح کو مزید نقصان سے بچانے کی کوشش قرار دیا، جبکہ کچھ صارفین نے ڈرائیور کو ہاتھ مارنے پر اداکار کو تنقید کا نشانہ بنایا۔