’ہمیں نہیں پتا، ہم تو لنچ کر رہے تھے‘، عمران خان کے بیٹوں کے انٹرویو پر تنازع سے سرفراز احمد لاعلم

لندن: پاکستان کرکٹ ٹیم کے ہیڈ کوچ سرفراز احمد نے کہا ہے کہ وہ اور قومی ٹیم کے کھلاڑی لارڈز ٹیسٹ کے دوران عمران خان کے بیٹوں کے انٹرویو کی نشریات پر پاکستان کرکٹ بورڈ (پی سی بی) اور انگلینڈ اینڈ ویلز کرکٹ بورڈ (ای سی بی) کے درمیان مبینہ تنازع سے لاعلم تھے۔

انگلینڈ کے خلاف دوسرے ٹیسٹ کے پہلے روز کھانے کے وقفے کے دوران اسکائی اسپورٹس نے سابق کپتان اور سابق وزیراعظم عمران خان کے بیٹوں سلیمان اور قاسم خان کا انٹرویو نشر کیا، جس کے بعد پی سی بی کی جانب سے مبینہ طور پر اسکائی اسپورٹس سے باضابطہ احتجاج کیا گیا۔

سابق انگلش کپتان اور موجودہ اسکائی اسپورٹس براڈکاسٹر مائیک ایتھرٹن نے سلیمان اور قاسم خان کا انٹرویو کیا تھا، جس کا بعد میں ایک ورژن نشر کیا گیا۔ عمران خان گزشتہ تین برس سے جیل میں ہیں جبکہ حالیہ ہفتوں میں ان کی صحت سے متعلق معاملات بھی توجہ کا مرکز رہے ہیں۔

بی بی سی کے ٹیسٹ میچ اسپیشل کے مطابق سرفراز احمد نے کہا کہ ٹیم اور کھلاڑی صرف میچ پر توجہ مرکوز کیے ہوئے تھے اور انہیں اس معاملے سے متعلق کوئی معلومات نہیں تھیں۔

صحافی کے سوال پر سرفراز احمد نے کہا، ’’مجھے کچھ علم نہیں، میں صرف میچ پر فوکس کر رہا ہوں۔‘‘

رپورٹس کے مطابق پی سی بی نے لنچ بریک سے قبل ہی اسکائی اسپورٹس سے رابطہ کرکے پروگرام کے اس حصے پر احتجاج کیا تھا۔ بعض اطلاعات میں دعویٰ کیا گیا کہ اگر انٹرویو نشر کیا گیا تو پاکستانی کھلاڑی لنچ کے بعد میدان میں واپس نہیں آئیں گے۔

تاہم بعد میں انٹرویو کا ایک ترمیم شدہ ورژن نشر کیا گیا اور کھانے کے وقفے کے بعد پاکستانی کھلاڑی میدان میں واپس آگئے، جس کے بعد میچ معمول کے مطابق جاری رہا۔

جب صحافی نے سرفراز احمد سے پوچھا کہ کیا لنچ کے بعد کھلاڑیوں کے میدان میں واپس نہ آنے کی کوئی تجویز زیر غور تھی تو انہوں نے واضح جواب دیا کہ ایسا کچھ نہیں تھا۔

سرفراز احمد نے کہا، ’’نہیں، نہیں۔ آپ انٹرویو کی بات کر رہے ہیں، ہمیں ان انٹرویوز کے بارے میں کچھ معلوم نہیں۔‘‘

مزید سوال پر کہ کیا کھلاڑیوں نے بہرحال کھیل جاری رکھنا تھا، سرفراز احمد نے مختصر جواب دیتے ہوئے کہا، ’’سب ٹھیک ہیں، اس وقت ہم لنچ کر رہے تھے۔‘‘

ہیڈ کوچ کے بیان سے ظاہر ہوتا ہے کہ ٹیم انتظامیہ اور کھلاڑی مبینہ طور پر اس تنازع سے الگ رہتے ہوئے اپنی توجہ صرف میچ پر مرکوز رکھے ہوئے تھے۔