خیبرپختونخوا اور بلوچستان میں سکیورٹی فورسز کی کارروائیاں، 17 دہشت گرد ہلاک، 6 جوان شہید

راولپنڈی: خیبرپختونخوا اور بلوچستان میں سکیورٹی فورسز کی مختلف کارروائیوں کے دوران 17 دہشت گرد ہلاک جبکہ فورسز کے 6 جوان شہید ہوگئے۔

سکیورٹی ذرائع کے مطابق بلوچستان میں آپریشن ردالفتنہ-3 کے تحت دہشت گردوں کے خلاف کارروائیاں جاری ہیں۔ پنجگور کے علاقے فتح علی میں سکیورٹی فورسز نے کارروائی کرتے ہوئے فتنہ الہندوستان کے 5 دہشت گردوں کو ہلاک کردیا۔ کارروائی کے دوران ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔

سکیورٹی فورسز نے ضلع کچھی کے علاقے دھاڈر میں بھی انٹیلی جنس بیسڈ آپریشن کیا، جس کے دوران 2 دہشت گرد ہلاک ہوگئے جبکہ متعدد دہشت گردوں کے زخمی ہونے کی اطلاعات ہیں۔

دوسری جانب آئی ایس پی آر کے مطابق شمالی وزیرستان میں خوارج کی موجودگی کی اطلاع پر سکیورٹی فورسز نے انٹیلی جنس بیسڈ آپریشن کیا۔ کارروائی کے دوران خوارج کے ٹھکانے کو مؤثر انداز میں نشانہ بنایا گیا اور شدید فائرنگ کے تبادلے میں 6 خوارج ہلاک ہوگئے۔

آئی ایس پی آر کے مطابق ہنگو میں ایک اور جھڑپ کے دوران 4 خوارج مارے گئے۔ اس دوران ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔

آئی ایس پی آر کے مطابق 17 ستمبر کو سکیورٹی فورسز کے قافلے کو آئی ای ڈی کے ذریعے نشانہ بنایا گیا، جس کے نتیجے میں 6 جوان شہید ہوگئے۔

سکیورٹی فورسز کی جانب سے بلوچستان اور خیبرپختونخوا میں دہشت گردوں کے خلاف کارروائیاں جاری ہیں، جبکہ حکام کے مطابق کارروائیوں کا مقصد دہشت گردی کا خاتمہ اور ملک میں امن و امان کا قیام ہے۔