ٹرمپ اور پزشکیان نے مفاہمتی یادداشت پر دستخط کر دیے، وزیراعظم شہباز شریف نے تاریخی پیشرفت کی توثیق کر دی

(اسلام آباد) وزیراعظم شہباز شریف نے اعلان کیا ہے کہ امریکی صدر ڈونلڈ ٹرمپ اور ایرانی صدر مسعود پزشکیان کے درمیان مفاہمتی یادداشت (ایم او یو) پر دستخط ہو چکے ہیں، جس کے بعد خطے میں کشیدگی کم ہونے اور استحکام کی نئی امید پیدا ہوئی ہے۔

وزیراعظم نے اپنے بیان میں کہا کہ اسلام آباد میں طے پانے والا مفاہمتی معاہدہ فوری طور پر نافذ العمل ہوگا۔ معاہدے کے تحت امریکا ایران کے خلاف بحری ناکہ بندی ختم کرے گا جبکہ ایران آبنائے ہرمز کو دوبارہ کھول دے گا، جس سے عالمی تجارت اور توانائی کی ترسیل میں حائل رکاوٹیں دور ہونے کی توقع ہے۔

شہباز شریف نے کہا کہ انہوں نے بطور ثالث اس معاہدے کی توثیق بھی کی ہے۔ ان کے مطابق 19 جون کو سوئٹزرلینڈ میں ایک تاریخی تقریب منعقد ہوگی جبکہ تکنیکی سطح کے مذاکرات کا باقاعدہ آغاز بھی اسی روز سے ہوگا۔

وزیراعظم نے ایرانی قیادت، خصوصاً سپریم لیڈر مجتبیٰ خامنہ ای اور صدر مسعود پزشکیان کو خراج تحسین پیش کرتے ہوئے کہا کہ اسلام آباد معاہدہ خطے میں امن، استحکام اور مشترکہ خوشحالی کی بنیاد ثابت ہوگا۔

انہوں نے امریکی صدر ڈونلڈ ٹرمپ کو بھی مبارکباد دی اور کہا کہ ان کی سفارتکاری نے ایک ممکنہ بڑے تصادم کو روکنے میں اہم کردار ادا کیا۔ وزیراعظم نے امریکی مذاکراتی ٹیم کی خدمات کو بھی سراہا۔

شہباز شریف نے مزید کہا کہ فیلڈ مارشل سید عاصم منیر کی انتھک محنت، بے لوث خدمات اور فیصلہ کن کردار کے باعث یہ تاریخی پیشرفت ممکن ہوئی، جسے خطے کے امن کے لیے ایک اہم سنگ میل قرار دیا جا رہا ہے۔