شہباز شریف کا مولانا فضل الرحمان سے ٹیلی فونک رابطہ، وزیراعظم ہاؤس ملاقات کی دعوت دے دی

اسلام آباد: وزیراعظم شہباز شریف نے جمعیت علمائے اسلام (ف) کے سربراہ مولانا فضل الرحمان سے ٹیلی فونک رابطہ کیا اور انہیں عمرہ کی ادائیگی پر مبارکباد دی۔

گفتگو کے دوران وزیراعظم شہباز شریف نے مولانا فضل الرحمان کو ملاقات کے لیے وزیراعظم ہاؤس آنے کی دعوت دی، جسے جے یو آئی (ف) کے سربراہ نے قبول کرلیا۔ دونوں رہنماؤں کے درمیان ملاقات جلد متوقع ہے۔

ذرائع کے مطابق ٹیلی فونک گفتگو میں مولانا فضل الرحمان نے وزیراعظم شہباز شریف سے خیبر پختونخوا کی حکومت کے ساتھ تناؤ کم کرنے کے معاملے پر بھی بات چیت کی۔

وزیراعظم اور مولانا فضل الرحمان کی متوقع ملاقات میں سیاسی صورتحال اور باہمی مشاورت سے متعلق امور پر گفتگو ہونے کا امکان ہے۔