شیر افضل مروت کا سہیل آفریدی کے بطور وزیراعلیٰ انتخاب کو چیلنج کرنے کا اعلان

اسلام آباد: قومی اسمبلی کے رکن شیر افضل مروت نے سہیل آفریدی کے بطور وزیراعلیٰ انتخاب کو چیلنج کرنے کا اعلان کرتے ہوئے کہا ہے کہ خیبر پختونخوا میں خراب گورننس اور سیاسی تباہی سب کے سامنے ہے۔

شیر افضل مروت نے کہا کہ جب علی امین گنڈاپورکو میرے اس فیصلے کا علم ہوا تو انہوں نے کہا کہ ایسا نہ کیا جائے، تاہم میں اب علی امین گنڈاپور کی اس بات کو رد کرتے ہوئے انتخاب کو چیلنج کروں گا۔

انہوں نے کہا کہ امید ہے سہیل آفریدی جلد گھر جائیں گے، میری ان سے کوئی ذاتی دشمنی نہیں لیکن انہیں لانے کا فیصلہ غلط تھا، اور اسی فیصلے نے پارٹی کو شدید نقصان پہنچایا۔

شیر افضل مروت کا کہنا تھا کہ سہیل آفریدی پارٹی کی مزاحمت کی طاقت کو نچلی سطح پر لے آئے ہیں، اگر پارٹی کو بچانا ہے تو سہیل آفریدی اور سلمان اکرم راجہ کو سائیڈ لائن کرنا ہوگا۔

انہوں نے مزید کہا کہ اگربیرسٹر گوہر اور علی امین گنڈاپور کو مکمل اختیار دیا جائے تو بانی تین ماہ کے اندر باہر آ سکتے ہیں۔

شیر افضل مروت نے زور دیا کہ پارٹی کی بقا، مضبوط مزاحمت اور سیاسی استحکام کیلئے درست قیادت اور بروقت فیصلے ناگزیر ہیں۔