سہیل آفریدی کی اپوزیشن رہنماؤں سے ملاقات، 27 ستمبر مارچ پر مشاورت

اسلام آباد: وزیراعلیٰ خیبرپختونخوا محمد سہیل آفریدی نے اپوزیشن لیڈر قومی اسمبلی محمود خان اچکزئی اور اپوزیشن لیڈر سینیٹ علامہ ناصر عباس سے ملاقات کی، جس میں 27 ستمبر کے مارچ اور آئندہ کی سیاسی و جمہوری حکمت عملی پر تفصیلی تبادلہ خیال کیا گیا۔

ملاقات کے دوران وزیراعلیٰ خیبرپختونخوا نے پنجاب میں سٹریٹ موومنٹ اور پنجاب حکومت کی جانب سے کیے گئے اقدامات کے حوالے سے اپوزیشن رہنماؤں کو بریفنگ دی۔ محمود خان اچکزئی اور علامہ ناصر عباس نے سہیل آفریدی کی پُرامن سٹریٹ موومنٹ کو سراہا۔

اپوزیشن رہنماؤں نے پنجاب حکومت کی جانب سے سیاسی کارکنوں اور جمہوری آوازوں کے خلاف اقدامات کی مذمت کرتے ہوئے کہا کہ سیاسی اختلاف کو دبانے کے لیے ریاستی طاقت کا استعمال جمہوری اقدار اور آئینی آزادیوں کے منافی ہے۔

ملاقات میں 27 ستمبر کو ہونے والے مارچ کے حوالے سے بھی تفصیلی مشاورت کی گئی۔ رہنماؤں نے کہا کہ 27 ستمبر کا مارچ مکمل طور پر پُرامن، آئینی اور جمہوری ہوگا، جبکہ عوام اپنے آئینی و جمہوری حقوق کے لیے سڑکوں پر نکلیں گے۔

ملاقات میں کہا گیا کہ صوبوں کے آئینی حقوق پر کسی صورت سمجھوتہ نہیں کیا جائے گا۔ رہنماؤں نے اس بات پر اتفاق کیا کہ آئین کی بالادستی، جمہوریت کے تحفظ اور عوام کے مینڈیٹ کے احترام کے لیے جمہوری قوتوں کا متحد ہونا ضروری ہے۔

اپوزیشن رہنماؤں کے مطابق آئین اور جمہوری اصولوں کے دفاع کے لیے واضح اور مؤثر سیاسی کردار ناگزیر ہے۔