ٹرمپ انتظامیہ اپنی کامیابی کا بیانیہ پیش کرکے ناکامی چھپانا چاہتی ہے، ایران

ایرانی وزارت خارجہ کے ترجمان اسماعیل بقائی نے کہا ہے کہ ٹرمپ انتظامیہ ایران کے خلاف فوجی کارروائیوں کی ذمہ داری سے بچنے کے لیے گمراہ کن بیانیہ پیش کر رہی ہے۔ ایران نے 1979 کے انقلاب سے متعلق امریکی مؤقف کو بھی مسترد کردیا
تہران: ایرانی وزارت خارجہ کے ترجمان اسماعیل بقائی نے الزام عائد کیا ہے کہ ٹرمپ انتظامیہ ایران کے خلاف فوجی کارروائیوں کے نتائج اور اپنی ذمہ داری سے بچنے کے لیے گمراہ کن بیانیہ پیش کر رہی ہے۔
اسماعیل بقائی کا کہنا ہے کہ امریکی حکام کی جانب سے یہ مؤقف اختیار کرنا کہ ایران نے 1979 کے اسلامی انقلاب کے ذریعے امریکا کے ساتھ جنگ شروع کی، تاریخی حقائق کے منافی اور من گھڑت ہے۔
ایرانی وزارت خارجہ کے ترجمان نے کہا کہ 1979 کا اسلامی انقلاب دراصل ایرانی عوام کی جانب سے قومی خودمختاری، آزادی اور انسانی وقار کی بحالی کی تحریک تھا۔ اس وقت ایرانی عوام کے ذہنوں میں 1953 میں امریکی خفیہ ایجنسی سی آئی اے کی حمایت سے ہونے والی بغاوت کی تلخ یادیں بھی تازہ تھیں۔
امریکا پر مذاکرات کے دوران فوجی کارروائیوں کا الزام
اسماعیل بقائی نے الزام لگایا کہ امریکا یہ حقیقت نہیں چھپا سکتا کہ اس نے دو مرتبہ مذاکرات کے دوران ایران کے خلاف بلااشتعال فوجی کارروائی کی۔
ان کے مطابق امریکی حملوں میں ایران کے سپریم لیڈر اور اعلیٰ حکام کو نشانہ بنایا گیا، خواتین اور بچے شہید و زخمی ہوئے جبکہ ملک کے اہم بنیادی ڈھانچے کو بھی نقصان پہنچایا گیا۔
انہوں نے کہا کہ فوجی جارحیت کی واضح تعریف موجود ہے اور تاریخی حقائق کو تبدیل کرکے اس کی ذمہ داری سے بچنا ممکن نہیں۔
امریکی انتظامیہ سیاسی اور فوجی مشکلات کا شکار ہے، بقائی
ایرانی ترجمان نے مزید کہا کہ امریکی انتظامیہ فوجی اور سیاسی محاذ پر مشکلات سے دوچار ہے اور اب جنگ شروع کرنے کی ذمہ داری قبول کرنے کے بجائے اس سے انکار کرنے کی کوشش کر رہی ہے۔
ان کا کہنا تھا کہ ٹرمپ انتظامیہ اپنی کامیابی کا بیانیہ پیش کرکے ناکامیوں کو چھپانا چاہتی ہے اور ایران کے خلاف تاریخی دشمنی کو ہوا دینے کی ذمہ دار بھی امریکا ہے۔
اسماعیل بقائی کے مطابق امریکی سیاسی نظام کی اعلیٰ ترین سطح پر بھی یہ تسلیم کیا گیا ہے کہ ایران کے خلاف جنگ امریکی انتخابی شکست کی بنیادی وجوہات میں شامل تھی۔
انہوں نے الزام عائد کیا کہ امریکا نے ایران کے خلاف فوجی جارحیت کا آغاز کیا اور اب اس تنازعے کی ذمہ داری سے بچنے کے لیے تاریخی واقعات کو اپنے مؤقف کے حق میں پیش کرنے کی کوشش کر رہا ہے۔
واضح رہے کہ ایران اور امریکا کے درمیان فوجی کشیدگی کے ساتھ سیاسی اور سفارتی محاذ پر بھی بیانات کا تبادلہ جاری ہے، جبکہ دونوں ممالک کے درمیان تنازعے کی وجوہات اور فوجی کارروائیوں کی ذمہ داری سے متعلق مؤقف ایک دوسرے سے مختلف ہیں۔
شائع ہوا: 15 نومبر، 2026 کو 05:39 AM
آخری تدوین: 15 نومبر، 2026



