لاہور میں بچوں کی نازیبا ویڈیو سوشل میڈیا پر وائرل کرنے والا ملزم گرفتار

لاہور: پولیس نے کم سن بچوں کی نازیبا ویڈیو سوشل میڈیا پر وائرل کرنے کے الزام میں ایک ملزم کو گرفتار کر لیا ہے، جبکہ واقعے میں دیگر افراد کے ملوث ہونے کے شبہے پر تحقیقات جاری ہیں۔

ڈی آئی جی آپریشنز کے ترجمان کے مطابق ایک شہری نے پولیس کو شکایت درج کرائی کہ اس کے کم سن بھتیجے اور بھانجے سے متعلق ایک نازیبا ویڈیو سوشل میڈیا پر وائرل ہوئی ہے، جس پر خاندان کو شدید تشویش لاحق ہے۔

ترجمان نے بتایا کہ شکایت موصول ہونے کے بعد گڑھی شاہو پولیس نے مقدمہ درج کرکے کارروائی کی اور ایک ملزم کو گرفتار کر لیا۔ پولیس کو شبہ ہے کہ ویڈیو کو سوشل میڈیا پر پھیلانے کے پیچھے دیگر عناصر بھی ملوث ہو سکتے ہیں، جن کی شناخت کے لیے تحقیقات کی جا رہی ہیں۔

پولیس حکام کے مطابق گرفتار ملزم کے ڈیجیٹل شواہد کا تجزیہ کرنے اور ممکنہ طور پر ملوث دیگر افراد کی نشاندہی کے لیے نیشنل سائبر کرائم انویسٹی گیشن ایجنسی (این سی سی آئی اے) کو مراسلہ بھی ارسال کر دیا گیا ہے۔

ڈی آئی جی آپریشنز کے ترجمان نے بچوں کو مبینہ طور پر جرائم سے متعلق سرگرمیوں کے ٹاسک دے کر اسے چیلنج سمجھنے کے رجحان پر تشویش کا اظہار کیا۔ ان کا کہنا تھا کہ بچوں کو ایسے واقعات سے محفوظ رکھنا اور سوشل میڈیا پر نقصان دہ مواد کے پھیلاؤ کو روکنا انتہائی ضروری ہے۔

پولیس کی جانب سے واقعے کی مزید تفتیش جاری ہے، جبکہ ویڈیو پھیلانے میں ملوث دیگر ممکنہ افراد کے کردار کا تعین ڈیجیٹل شواہد کے تجزیے کے بعد کیا جائے گا۔