روٹی کی قیمت پر نان بائیوں اور محکمہ خوراک میں تنازع برقرار، تندور بند کرنے کی دھمکی

لاہور: نان بائی ایسوسی ایشن اور محکمہ خوراک کے درمیان روٹی اور نان کی نئی قیمتوں کے تعین پر اختلافات برقرار ہیں، جبکہ نان بائیوں نے مطالبات تسلیم نہ ہونے کی صورت میں تندور بند کرنے کی دھمکی دے دی ہے۔

ذرائع کے مطابق روٹی کی قیمت کے معاملے پر نان بائی ایسوسی ایشن نے ہفتہ کے روز اہم اجلاس طلب کر لیا ہے، جس میں روٹی اور نان کی نئی قیمتوں کا باضابطہ اعلان کیے جانے کا امکان ہے۔

نان بائی ایسوسی ایشن کے ذرائع کا کہنا ہے کہ اجلاس میں روٹی کی قیمت 25 روپے اور نان کی قیمت 35 روپے مقرر کرنے کا فیصلہ کیا گیا ہے۔ ان کا مؤقف ہے کہ آٹے، گیس اور دیگر اخراجات میں اضافے کے باعث موجودہ نرخوں پر کاروبار جاری رکھنا ممکن نہیں رہا۔

ذرائع کے مطابق اگر انتظامیہ کی جانب سے زبردستی پرانی قیمتوں پر فروخت کرنے کا دباؤ ڈالا گیا تو نان بائی تندور بند کرنے پر مجبور ہوں گے۔

دوسری جانب ذرائع کا کہنا ہے کہ پنجاب حکومت تاحال روٹی اور نان کی نئی سرکاری قیمت مقرر نہیں کر سکی، جس کے باعث صورتحال غیر یقینی کا شکار ہے۔ نان بائی ایسوسی ایشن اور محکمہ خوراک کے درمیان مذاکرات کے باوجود اب تک کوئی حتمی اتفاق رائے سامنے نہیں آ سکا۔

عوام کی نظریں اب نان بائی ایسوسی ایشن کے آئندہ اجلاس اور پنجاب حکومت کے فیصلے پر مرکوز ہیں، جس سے روٹی اور نان کی قیمتوں کے مستقبل کا تعین ہوگا۔