ٹرمپ کا ’ٹرمپ ڈیویڈنڈ‘ کا اعلان، بالغ امریکیوں کو 5 ہزار ڈالر دینے کی تجویز

واشنگٹن: امریکی صدر ڈونلڈ ٹرمپ نے نومبر میں ہونے والے وسط مدتی انتخابات سے قبل ایک اہم مالی تجویز پیش کرتے ہوئے ریپبلکن پارٹی کے کانگریس پر کنٹرول برقرار رکھنے کی صورت میں ہر بالغ امریکی کو 5 ہزار ڈالر دینے کی تجویز دے دی۔

برطانوی خبر رساں ادارے کے مطابق ڈونلڈ ٹرمپ نے ریپبلکن پارٹی کے کنونشن سے خطاب کرتے ہوئے اس تجویز کو ’’ٹرمپ ڈیویڈنڈ‘‘ کا نام دیا۔ تاہم ابھی یہ واضح نہیں کہ مجوزہ رقم کس طریقۂ کار کے تحت امریکی شہریوں کو دی جائے گی اور آیا اس منصوبے پر عملدرآمد کے لیے قانونی منظوری حاصل ہے یا نہیں۔

ٹرمپ کی ووٹرز سے ریپبلکن امیدواروں کو ووٹ دینے کی اپیل

امریکی صدر نے وسط مدتی انتخابات میں ریپبلکن امیدواروں کی حمایت کرتے ہوئے ووٹرز سے انہیں ووٹ دینے کی اپیل کی۔

ٹرمپ نے اپنے خطاب میں کہا کہ ووٹرز انتخابات کو اس طرح سمجھیں جیسے وہ خود بیلٹ پر موجود ہوں۔

ریپبلکن پارٹی کو نومبر کے وسط مدتی انتخابات میں کانگریس کے کم از کم ایک ایوان کا کنٹرول کھونے کا خدشہ ہے، جس کے باعث پارٹی کی جانب سے انتخابی مہم تیز کی جا رہی ہے۔

ایران کے ساتھ جنگ پر ٹرمپ کا مؤقف

ڈونلڈ ٹرمپ نے ایران کے ساتھ جنگ کا بھی دفاع کیا اور کہا کہ امریکی کارروائی کا مقصد ایران کو جوہری ہتھیار تیار کرنے سے روکنا تھا۔

انہوں نے دعویٰ کیا کہ ایران کے خلاف جنگ میں کامیابی کے بعد تیل کی قیمتیں کم ہوجائیں گی۔

وسط مدتی انتخابات میں ریپبلکنز کو چیلنج

دوسری جانب رائے عامہ کے جائزوں کے مطابق ڈیموکریٹک ووٹرز ریپبلکنز کے مقابلے میں وسط مدتی انتخابات کے لیے زیادہ پرجوش دکھائی دے رہے ہیں۔

انتخابات میں کانگریس کے ایوانِ نمائندگان اور سینیٹ کے لیے ہونے والی ووٹنگ ریپبلکن پارٹی کے لیے اہم قرار دی جا رہی ہے، کیونکہ ایک ایوان کا کنٹرول بھی کھونا صدر ٹرمپ کے آئندہ سیاسی ایجنڈے پر اثر انداز ہوسکتا ہے۔

تاہم بالغ امریکیوں کو 5 ہزار ڈالر دینے سے متعلق ٹرمپ کی تجویز کے مالی، قانونی اور انتظامی خدوخال ابھی واضح نہیں کیے گئے۔