پاکستان کی درخواست پر ایران کے خلاف کارروائی روکی، معاہدہ نہ ہوا تو کام مکمل کریں گے: ٹرمپ

امریکی صدر ڈونلڈ ٹرمپ نے ایران کے ساتھ جاری کشیدگی اور مذاکرات پر اہم بیان دیتے ہوئے کہا ہے کہ امریکا ایران کے ساتھ وہی کر سکتا تھا جو وینزویلا کے ساتھ کیا گیا، تاہم پاکستان کی درخواست پر ایران کے خلاف کارروائی روک دی گئی۔

ایک امریکی ٹی وی چینل کو انٹرویو دیتے ہوئے ٹرمپ نے کہا کہ ایران اس وقت معاہدہ کرنا چاہتا ہے، لیکن مجوزہ ڈیل ابھی حتمی مرحلے میں داخل نہیں ہوئی اور امریکا اب تک اس سے مکمل طور پر مطمئن نہیں۔

انہوں نے کہا کہ ایران انتہائی کمزور پوزیشن میں مذاکرات کر رہا ہے اور اس کے پاس زیادہ راستے موجود نہیں۔ ٹرمپ کے مطابق اگر معاہدہ ہو گیا تو صورتحال بہتر ہو سکتی ہے، بصورت دیگر امریکا “کام مکمل” کرنے کی جانب جا سکتا ہے۔

صدر ٹرمپ نے واضح کیا کہ امریکا ایران کو انتہائی افزودہ یورینیم ترک کرنے کے بدلے پابندیوں میں نرمی دینے پر غور نہیں کر رہا۔ ان کا کہنا تھا کہ وہ اس بات سے بھی مطمئن نہیں ہوں گے کہ ایران اپنا افزودہ یورینیم روس یا چین کے حوالے کر دے۔

ٹرمپ نے مزید کہا کہ آبنائے ہرمز دنیا بھر کی تجارت کے لیے کھلی رہنی چاہیے اور کوئی بھی ملک اس پر مکمل کنٹرول حاصل نہیں کر سکتا۔ ان کے مطابق ایران کو بھی عالمی برادری کے دیگر ممالک کی طرح ذمہ دارانہ رویہ اختیار کرنا ہوگا۔

انہوں نے دعویٰ کیا کہ ایران کے ساتھ فریم ورک معاہدہ طے پانے کی صورت میں آبنائے ہرمز میں بحری نقل و حرکت فوری طور پر بحال کر دی جائے گی۔

امریکی صدر نے پاکستانی قیادت کا ذکر کرتے ہوئے کہا کہ فیلڈ مارشل عاصم منیر اور وزیراعظم شہباز شہریف بہترین شخصیات ہیں۔

ٹرمپ نے ایران جنگ کے حوالے سے کہا کہ اس تنازع میں امریکا کو صرف 13 ہلاکتوں کا سامنا کرنا پڑا، جبکہ افغانستان، عراق اور دیگر جنگوں میں ہزاروں امریکی جانیں ضائع ہوئی تھیں۔