ہارٹ فورڈ یونیورسٹی کے طلباء کا پاکستانی سفارتخانے کا دورہ، پاکستان کی سفارت کاری میں دلچسپی

ہارٹ فورڈ یونیورسٹی کے بین الاقوامی طلبہ کے وفد نے واشنگٹن میں پاکستانی سفارتخانے کا دورہ کیا، سفیر رضوان سعید شیخ نے پاکستان کی سفارتی ترجیحات اور پاک امریکا تعلقات پر بریفنگ دی
واشنگٹن: واشنگٹن میں ہارٹ فورڈ یونیورسٹی کے بین الاقوامی طلباء کے وفد نے پاکستانی سفارتخانے کا دورہ کیا، جہاں سفیر پاکستان رضوان سعید شیخ نے طلباء کو پاکستان کی سفارتی ترجیحات، پاک امریکا تعلقات اور عالمی و علاقائی امن کیلئے پاکستان کی کوششوں پر بریفنگ دی۔

پیس بلڈنگ میں ماسٹرز ڈگری کے طلباء کا تعلق امریکا سمیت البانیہ، گھانا، انڈونیشیا اور لبنان سے تھا۔ وفد واشنگٹن میں پیس اینڈ جسٹس ایسوسی ایشن کانفرنس میں شرکت کیلئے موجود ہے۔

سفیر رضوان سعید شیخ نے کہا کہ پاکستان کی سفارت کاری آٹھ دہائیوں سے عالمی اور علاقائی امن پر مرکوز ہے۔ پاکستان نے ماضی میں امریکا اور چین کے درمیان پل کا کردار ادا کیا جبکہ 1988 کے جنیوا معاہدے میں بھی اہم کردار ادا کیا۔

انہوں نے کہا کہ امریکا ایران تنازع میں پاکستان کی سفارتی کوششوں کے نتیجے میں اسلام آباد مفاہمتی یادداشت ایک اہم بنیاد قائم ہوئی، جبکہ پاکستان کی کوششوں سے ایران اور امریکا 47 سال بعد ایک جگہ اکٹھے ہوئے۔

سفیر پاکستان نے کہا کہ سفارت کاری ایک مسلسل اور تدریجی عمل ہے جس میں رازداری کو خصوصی اہمیت حاصل ہے۔ پاکستان آج بھی خطے میں امن کیلئے اتحادی ممالک کے ساتھ مل کر کردار ادا کر رہا ہے۔

انہوں نے دہشت گردی کے خلاف پاکستان کی قربانیوں، معاشی ترقی کیلئے حکومتی کوششوں اور نوجوان نسل کو ملک کا قیمتی سرمایہ قرار دیا۔


شائع ہوا: 2 اکتوبر، 2026 کو 07:04 AM
آخری تدوین: 3 اکتوبر، 2026



