امریکا کی ایران پر جارحیت جاری، بندرعباس اور اہواز دھماکوں سے گونج اٹھے

(تہران) ایران کے مختلف علاقوں میں امریکی کارروائیوں کا سلسلہ جاری ہے، جہاں بندرعباس، اہواز اور قشم جزیرے کے قریب دھماکوں کی اطلاعات موصول ہوئی ہیں۔

ایرانی میڈیا کے مطابق بندرعباس اور اہواز شہر دھماکوں سے گونج اٹھے، جبکہ خلیج فارس میں واقع قشم جزیرے کے قریب بھی زور دار دھماکوں کی آوازیں سنی گئیں۔

رپورٹس کے مطابق امریکی فوج کے دو میزائل موسان گاؤں کے قریب گرے، تاہم فوری طور پر جانی یا مالی نقصان کی تفصیلات جاری نہیں کی گئیں۔

دوسری جانب امریکی حکام کا کہنا ہے کہ ان کارروائیوں کا مقصد پاسدارانِ انقلاب کی جانب سے تجارتی جہاز رانی کو لاحق خطرات کو کم کرنا اور سمندری راستوں کے تحفظ کو یقینی بنانا ہے۔

امریکا اور ایران کے درمیان بڑھتی ہوئی کشیدگی کے باعث خطے کی سیکیورٹی صورتحال مزید پیچیدہ ہو گئی ہے، جبکہ عالمی برادری مسلسل دونوں ممالک سے تحمل اور کشیدگی میں کمی کی اپیل کر رہی ہے۔