دوبارہ جنگ کی تیاریاں؟ امریکی کارگو طیارے گولا بارود لے کر اسرائیل پہنچ گئے

(تل ابیب) اسرائیلی میڈیا نے دعویٰ کیا ہے کہ گزشتہ 24 گھنٹوں کے دوران درجنوں امریکی کارگو طیارے گولا بارود اور عسکری سامان لے کر اسرائیل پہنچے ہیں، جس کے بعد خطے میں ایک نئی جنگ کے خدشات بڑھ گئے ہیں۔

رپورٹس کے مطابق امریکی طیاروں کی آمد کو ایران کے خلاف ممکنہ فوجی کارروائی کی تیاریوں سے جوڑا جا رہا ہے۔ اسرائیلی میڈیا کا کہنا ہے کہ یہ عسکری سپلائی خطے میں بڑھتی ہوئی کشیدگی کے تناظر میں کی جا رہی ہے۔

ذرائع کے مطابق امریکی اور اسرائیلی حکام کی جانب سے اس حوالے سے باضابطہ تفصیلات جاری نہیں کی گئیں، تاہم عسکری ماہرین کا کہنا ہے کہ بڑے پیمانے پر گولا بارود کی منتقلی غیر معمولی پیش رفت تصور کی جا رہی ہے۔

مشرق وسطیٰ میں حالیہ مہینوں کے دوران ایران اور اسرائیل کے درمیان کشیدگی میں اضافہ دیکھا گیا ہے، جبکہ امریکا بھی خطے کی صورتحال پر مسلسل نظر رکھے ہوئے ہے۔

تجزیہ کاروں کے مطابق اگر حالات مزید خراب ہوئے تو خطے میں ایک نئی بڑی جنگ کے امکانات پیدا ہو سکتے ہیں، جس کے عالمی معیشت اور توانائی کی منڈیوں پر بھی گہرے اثرات مرتب ہوں گے۔