امریکا نے ایران کے لیے امن عمل کی 5 سخت شرائط مقرر کر دیں

(واشنگٹن) فارس نیوز ایجنسی کے مطابق واشنگٹن نے واضح کیا ہے کہ ان شرائط کی تکمیل کے بغیر دونوں ممالک کے درمیان کسی بھی امن عمل کو آگے نہیں بڑھایا جا سکتا۔

رپورٹ کے مطابق امریکا نے ایران کے اس مطالبے کو بھی مسترد کر دیا ہے جس میں ایرانی سرزمین پر بمباری سے ہونے والے نقصانات کے ازالے کے لیے معاوضہ طلب کیا گیا تھا۔

امریکی مؤقف کے مطابق کسی بھی قسم کی مالی ادائیگی پر رضامندی نہیں ہوگی جبکہ جنگ بندی کو بھی براہ راست مذاکرات سے مشروط کیا جا رہا ہے۔

میڈیا رپورٹس میں بتایا گیا ہے کہ امریکا کی جانب سے ایران کے جوہری پروگرام سے متعلق سخت مطالبات سامنے آئے ہیں، جن میں 400 کلوگرام افزودہ یورینیم کی منتقلی اور صرف ایک جوہری مرکز کو محدود پیمانے پر فعال رکھنے کی شرط شامل ہے۔

مزید یہ کہ امریکا نے ایران کے منجمد اثاثوں میں صرف 25 فیصد تک نرمی پر آمادگی ظاہر کی ہے، جبکہ لبنان سمیت دیگر علاقائی محاذوں پر کشیدگی کے خاتمے کے لیے بھی مذاکرات پر زور دیا جا رہا ہے۔

تجزیہ کاروں کے مطابق یہ شرائط خطے میں سفارتی دباؤ کو مزید بڑھا سکتی ہیں، جبکہ ایران کی جانب سے ان پر ردعمل آنے کے امکانات بھی موجود ہیں۔