ایرانی ایوی ایشن شعبے کی معاونت پر 36 اداروں اور افراد پر امریکی پابندیاں

امریکا نے ایران سے متعلق نئی پابندیاں عائد کرتے ہوئے ایرانی ایوی ایشن شعبے کی معاونت کرنے والے 36 اداروں اور افراد کو پابندیوں کی فہرست میں شامل کرلیا۔

امریکی محکمہ خزانہ کے مطابق پابندیوں کا مقصد ایرانی حکومت اور پاسدارانِ انقلاب کی مالی معاونت کے ذرائع کو محدود کرنا ہے۔ امریکی مالیاتی اداروں سے کہا گیا ہے کہ وہ ایرانی ایوی ایشن شعبے کی معاونت کرنے والے نیٹ ورکس سے متعلق معلومات فراہم کریں۔

امریکی محکمہ خزانہ کا کہنا ہے کہ ایران کا ایوی ایشن شعبہ مبینہ طور پر ہتھیاروں اور غیر قانونی سامان کی منتقلی کے لیے استعمال ہوتا ہے، جبکہ ایرانی ایئرلائن مہان ایئر کی معاونت کرنے والی کمپنیوں پر بھی پابندیاں عائد کی گئی ہیں۔

امریکا نے ایران سے متعلق 3 فضائی اجازت نامے بھی معطل کرنے کا اعلان کیا ہے۔ امریکی حکام کے مطابق ایران کے ساتھ کاروبار کرنے والی ایئرلائنز کو عالمی مالیاتی نظام کے حوالے سے خطرات کا سامنا ہوسکتا ہے۔

امریکی محکمہ خزانہ نے خبردار کیا کہ ایرانی ایئرلائنز کو سہولت فراہم کرنے والوں کو سنگین نتائج کا سامنا کرنا پڑے گا اور ایرانی ایوی ایشن شعبے کی معاونت کرنے والوں کو جواب دہ ٹھہرایا جائے گا۔

امریکی حکام کے مطابق نئی پابندیوں کا بنیادی مقصد ایرانی حکومت اور پاسدارانِ انقلاب کی مالی معاونت کے ذرائع کو بند کرنا اور ایران پر اقتصادی دباؤ مزید بڑھانا ہے۔