فیفا ورلڈ کپ 2026: امریکا کا شاندار آغاز، پیراگوئے کو 1-4 سے شکست

فیفا فٹبال ورلڈ کپ 2026 کے میزبان ممالک میں شامل امریکا نے ایونٹ کے اپنے پہلے میچ میں زبردست کارکردگی کا مظاہرہ کرتے ہوئے پیراگوئے کو 1 کے مقابلے میں 4 گول سے شکست دے دی۔

لاس اینجلس میں کھیلے گئے اس دلچسپ مقابلے میں امریکی ٹیم نے آغاز ہی سے جارحانہ انداز اپنایا اور پہلے ہاف میں تین خوبصورت گول اسکور کرکے میچ پر اپنی گرفت مضبوط کر لی۔ شائقینِ فٹبال نے میزبان ٹیم کی برق رفتار اور منظم کارکردگی کو خوب سراہا۔

دوسرے ہاف میں بھی امریکا نے عمدہ کھیل کا سلسلہ برقرار رکھا اور ایک مزید گول اسکور کرکے اپنی برتری 4-0 تک پہنچا دی۔ پیراگوئے کی ٹیم نے واپسی کی کوشش کی اور دوسرے ہاف میں ایک گول کرکے خسارہ کم کیا، تاہم وہ میچ کا پانسہ پلٹنے میں ناکام رہی۔ یوں اختتامی سیٹی بجنے تک امریکا نے 1-4 سے فتح اپنے نام کر لی۔

دوسری جانب میچ کے آغاز سے قبل لاس اینجلس میں فیفا ورلڈ کپ 2026 کی شاندار افتتاحی تقریب بھی منعقد کی گئی، جس میں ہزاروں شائقینِ فٹبال نے شرکت کی۔ تقریب میں مختلف ثقافتی اور تفریحی پروگرام پیش کیے گئے، جنہوں نے ایونٹ کے آغاز کو یادگار بنا دیا۔

اس سے قبل ورلڈ کپ کی پہلی رنگا رنگ افتتاحی تقریب میکسیکو میں منعقد ہوئی تھی، جہاں عالمی شہرت یافتہ گلوکارہ شکیرا اور نائجیرین اسٹار برنا بوائے کی پرفارمنس نے دنیا بھر کے فٹبال شائقین کی توجہ حاصل کی تھی۔

امریکا کی اس شاندار فتح نے نہ صرف میزبان شائقین کا جوش بڑھا دیا ہے بلکہ ورلڈ کپ 2026 کے سنسنی خیز مقابلوں کے لیے بھی ایک بھرپور آغاز فراہم کر دیا ہے۔