راولپنڈی میں سکیورٹی ہائی الرٹ، دفعہ 144 نافذ، جلسے جلوسوں پر مکمل پابندی
راولپنڈی میں سکیورٹی خدشات کے پیش نظر انتظامیہ نے شہر بھر میں ہائی الرٹ جاری کرتے ہوئے دفعہ 144 نافذ کر دی ہے، جبکہ جلسے، جلوس اور ریلیوں پر مکمل پابندی عائد کر دی گئی ہے۔
(راولپنڈی)پولیس ذرائع کے مطابق اسلحے کی نمائش پر بھی مکمل پابندی عائد کر دی گئی ہے اور خلاف ورزی کرنے والوں کے خلاف سخت قانونی کارروائی کی جائے گی۔ پولیس حکام نے پی ٹی آئی کارکنوں اور رہنماؤں کی گرفتاریوں کے لیے فہرستیں مختلف تھانوں کو بھجوا دی ہیں۔
ذرائع کے مطابق 9 اپریل کو لیاقت باغ میں ہونے والے جلسے کی تاحال اجازت نہیں دی گئی، جبکہ سکیورٹی خدشات کے باعث ہر قسم کی سیاسی سرگرمیوں پر پابندی برقرار رکھی گئی ہے۔ خلاف ورزی کی صورت میں فوری گرفتاریوں کی ہدایات بھی جاری کر دی گئی ہیں۔
پولیس حکام کا کہنا ہے کہ قانون ہاتھ میں لینے، سرکاری املاک کو نقصان پہنچانے یا امن و امان خراب کرنے والوں کے خلاف سخت کارروائی کی تیاری مکمل کر لی گئی ہے۔ اس سلسلے میں پولیس کی خصوصی ٹیمیں گرفتاریوں کے لیے روانہ کر دی گئی ہیں۔
دوسری جانب لیاقت باغ میں مسلسل بارشوں کے باعث پانی جمع ہو گیا ہے، جس کے باعث جلسے کے انعقاد سے متعلق صورتحال مزید غیر یقینی ہو گئی ہے۔
پولیس ذرائع کے مطابق شہر کے داخلی اور خارجی راستوں کی کڑی نگرانی جاری ہے جبکہ جڑواں شہروں راولپنڈی اور اسلام آباد میں ہوٹلز اور مسافر خانوں میں ٹھہرنے والے افراد کی چھان بین بھی شروع کر دی گئی ہے۔
حکام کے مطابق سکیورٹی صورتحال معمول پر آنے تک پابندیاں برقرار رہیں گی۔
Web Desk
Media Channel
شائع ہوا: 8 اپریل، 2026 کو 12:41 PM
آخری تدوین: 8 اپریل، 2026
