پاکستان کا آبنائے ہرمز میں معمول کی بحری نقل و حرکت کی بحالی کا مطالبہ

(نیویارک) عاصم افتخار نے کہا کہ مشرق وسطیٰ کی صورتحال پر پاکستان کا واضح اور دو ٹوک مؤقف ہے، جاری تنازع نے نہ صرف خطے بلکہ دنیا کے دیگر ممالک کو بھی متاثر کیا ہے۔ انہوں نے کہا کہ تنازع کے آغاز سے ہی پاکستان نے مذاکرات کی بحالی اور کشیدگی میں کمی کو ترجیح دی ہے۔

انہوں نے مزید کہا کہ پاکستان نے جنگ بندی کی حمایت کرتے ہوئے 11 اور 12 اپریل کو اسلام آباد میں مذاکرات کی کامیاب میزبانی کی، جو پاکستان کی فعال سفارتی کوششوں کا نتیجہ تھے۔ ان مذاکرات کے ذریعے پاکستان خطے میں جنگ کے خاتمے اور امن کے قیام کے لیے کوشاں ہے۔

پاکستانی مندوب نے کہا کہ آبنائے ہرمز کی موجودہ صورتحال دنیا بھر کے ممالک پر منفی اثرات مرتب کر رہی ہے۔ اگر عسکری کشیدگی اور رکاوٹیں برقرار رہیں تو انسانی مشکلات میں اضافہ ہوگا اور یہ اثرات وسیع معاشی بحران کی شکل اختیار کر سکتے ہیں۔

انہوں نے زور دیتے ہوئے کہا کہ پاکستان آبنائے ہرمز کو جلد از جلد دوبارہ کھولنے اور حالات کو معمول پر لانے کی کوششوں کی حمایت کرتا ہے، جبکہ مشکل حالات میں خلیج تعاون کونسل ممالک کے ساتھ یکجہتی کا بھی اظہار کیا گیا۔