ایران معاہدے پر دستخط کیلئے پاکستان جاسکتا ہوں، صدر ٹرمپ

واشنگٹن ڈی سی ( اے ایف پی ) امریکی صدر ڈونلڈ ٹرمپ نے کہا ہے کہ امریکا اور ایران کے درمیان امن معاہدہ “انتہائی قریب” ہے اور وہ اس معاہدے پر دستخط کے لیے پاکستان جانے پر غور کر سکتے ہیں۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے دعویٰ کیا کہ تہران نے افزودہ یورینیم کا ذخیرہ امریکا کے حوالے کرنے پر رضامندی ظاہر کر دی ہے، جو کسی بھی ممکنہ معاہدے میں ایک اہم نکتہ سمجھا جاتا ہے۔

انہوں نے کہا: “ہم ایران کے ساتھ معاہدے کے بہت قریب ہیں۔ ہمیں اس بات کو یقینی بنانا تھا کہ ایران کبھی بھی جوہری ہتھیار حاصل نہ کرے… انہوں نے تقریباً تمام نکات مان لیے ہیں۔”

ایک سوال کے جواب میں کہ آیا وہ معاہدے پر دستخط کے لیے پاکستان جا سکتے ہیں، صدر ٹرمپ نے کہا: “میں جا سکتا ہوں، ہاں۔ اگر معاہدہ اسلام آباد میں ہوتا ہے تو میں جا سکتا ہوں۔”

ٹرمپ نے پاکستان کے وزیراعظم شہباز شریف اور آرمی چیف جنرل عاصم منیر کے کردار کو سراہتے ہوئے کہا کہ انہوں نے ایران سے مذاکرات میں “اہم اور مثبت” کردار ادا کیا ہے۔

امریکی نائب صدر جے ڈی وینس نے گزشتہ ہفتے اسلام آباد میں ایرانی حکام سے مذاکرات کیے تھے تاہم یہ بات چیت کسی حتمی نتیجے کے بغیر ختم ہو گئی تھی۔ وائٹ ہاؤس کے مطابق دوسرے مرحلے کی بات چیت پر غور جاری ہے، جو ممکنہ طور پر دوبارہ پاکستان میں ہو سکتی ہے۔

صدر ٹرمپ نے یہ بھی کہا کہ ایران نے اپنے افزودہ یورینیم کے ذخیرے کی واپسی پر رضامندی ظاہر کی ہے، جسے انہوں نے “نیوکلیئر ڈسٹ” قرار دیا، تاہم اس معاہدے کی تفصیلات ظاہر نہیں کی گئیں۔